The news is by your side.

Advertisement

پریا پرکاش، پذیرائی دیکھ کر جذبات قابو نہ رکھ سکیں

ممبئی: سوشل میڈیا پر وائرل ہونے والے چند سیکنڈ کی ویڈیو سے شہرت کی بلندیوں کو چھونے والی پریا پرکاش نے اپنی نئی آنے والی فلم کی تشہیر شروع کردی، انٹرنیٹ ہیروئن کو ایسی پذیرائی ملی کہ وہ اسے دیکھ کر زار وقطار رو پڑیں۔

تفصیلات کے مطابق چار روز قبل انٹرنیٹ پر گانے کا مختصر ویڈیو کلپ سامنے آیا جس میں ایک لڑکی اور لڑکے کی چھیڑ چھاڑ کو دکھایا گیا، یہ منظر کو عکس بند کرنے میں شوخیاں، نادانیاں اور معصومیت وغیرہ کا عنصر شامل تھا جس نے صرف بھارت ہی نہیں بلکہ دنیا بھر کے صارفین کو متاثر کیا۔

خوبرو بھارتی اداکارہ کا نام پریا پرکاش وریار ہے جس کی عمر ابھی 18 برس ہے اور یہ بھارتی ریاست کیرالہ کے شہر تھریسور میں ویمالا کالج میں بی کام کی طالبہ ہے۔

مختصر سا ویڈیو کلپ سامنے آنے کے بعد پریا پرکاش کو سوشل میڈیا صارفین نے تلاش کر کے فالو کرنا شروع کیا، محض چند ہی گھنٹوں کے دوران انسٹا گرام پر اُن کے فالورز کی تعداد چودہ لاکھ سے تجاوز کرگئی۔

مزید پڑھیں: پریا پرکاش کی ویڈیووائرل، فالوورزکی تعداد ایک ملین تک جاپہنچی

بھارتی میڈیا کے مطابق ابھرتی ہوئی اداکارہ اور لاکھوں نوجوانوں کے دل کی دھڑکن بننے والی اداکارہ نے اپنی فلم کی تشہیر کے سلسلے میں ایک نجی تقریب میں شرکت کی جس میں وہ سرخ رنگ کا جوڑا زیب تن کیے انتہائی سادہ دکھائی دے رہی تھیں۔

کوچی کے عوام کو جب پریا کی آمد کا علم ہوا تو تقریب شروع ہونے سے قبل ہی سیکڑوں نوجوان بشمول خواتین وہاں پہنچ گئے تاکہ سوشل میڈیا اسٹار کو براہ راست دیکھ سکیں۔

اداکارہ کی بھوئیں ہلانے اور شرارت بھری مسکراہٹ کی ادا دیکھنے کے لیے جمع ہونے والے لوگوں نے طویل انتظار کیا جس کا ثمر اُن کو پریا کی آمد کے وقت ملا، عام سی گاڑی میں آنے والی اداکارہ اپنا پرتپاک استقبال دیکھ کر دنگ رہ گئیں بعد ازاں انہوں نے ایک کالج کی تقریب میں بھی شرکت کی جہاں وہ تقریر کے دوران زاروقطار رونے لگیں۔

واضح رہے کہ پریا ملیالم زبان کی فلم ’ اورو آدار لو‘ میں مرکزی کردار ادا کررہی ہیں، انہیں فلم کی ریلیز سے قبل چھوٹے سے ویڈیو کلپ نے ہی اتنی شہرت دے دی کہ اب وہ خود بھی حیران ہیں۔

دوسری جانب بی بی سی کے نمائندہ کو انٹرویو دیتے ہوئے پریا نے بتایا کہ انہیں ڈائریکٹر نے شوٹ کے وقت دل لبھانے والی ایکٹنگ کرنے کو کہا اور ساتھ میں ہدایت کی کہ مسکراہٹ بھی ہونی چاہیے۔

اداکارہ کا کہنا ہے کہ انہوں نے ہدایت کار کی بات پر ویسے ہی عمل کیا اور یہ سین ایک ہی شوٹ میں ریکارڈ ہوا جس کا سہرا فلم ڈائریکٹر کو جاتا ہے کیونکہ یہ آئیڈیا انہی کا تھا۔

پریا نے اس خواہش کا بھی اظہار کیا کہ وہ بالی ووڈ کے کامیاب ہدایت کار سنجے لیلا بھنسالی کی فلم میں کام کرنے کی خواہش مند ہیں جبکہ اُن کی یہ دپیکا پڈوکون سے ملنے اور شاہ رخ، رنویر کے ساتھ کام کرنے کا بھی بہت شوق ہے۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Print Friendly, PDF & Email

Comments

comments

یہ بھی پڑھیں