اسلام آباد: پاکستان نے بھارت کو مسئلہ کشمیر پر باضابطہ طور پر ایک بار پھر دعوت دے دی، سیکریٹری خارجہ نے اپنے بھارتی ہم منصب کے خط کا جواب دیتے ہوئے انہیں جوابی خط تحریر کردیا جس میں انہیں دورہ پاکستان کی دعوت دی گئی ہے۔
دفتر خارجہ کے ترجمان نفیس زکریا کے مطابق بھارتی ہائی کمشنر گوتم بمبا والا نے سیکریٹری خارجہ اعزاز چوہدری سے ان کے دفتر میں ملاقات کی جہاں سیکریٹری خارجہ اعزاز چوہدر ی نے اپنے بھارتی ہم منصب کے نام خط ان کے حوالے کیا جس میں بھارتی ہم منصب کو رواں ماہ پاکستان آنے کی دعوت دی گئی ہے
ترجمان کے مطابق خط میں بھارتی سیکریٹری خارجہ کو مسئلہ کشمیر پر مذاکرات کرنے کی دعوت دی گئی ہے اور کہا ہے کہ مسئلہ کشمیر کا حل کشمیر کے عوام کی امنگوں کے مطابق حل ہونا چاہیے،مقبوضہ کشمیر میں انسانی حقوق کی خلاف ورزیاں فوری بند کی جائیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں