اسلام آباد: وفاقی وزیر اسد عمر نے کراچی کے مسائل کے حوالے سے کہا ہے کہ سیاست چلتی رہے گی، کراچی کے مسئلےحل کرنا چاہتے ہیں، کراچی میں تیزی سے کام کے لیے 2 ہفتے کا ٹاسک رکھا گیا ہے۔
تفصیلات کے مطابق آج اسلام آباد میں پریس کانفرنس کرتے ہوئے وفاقی وزیر اسد عمر نے کہا کہ کراچی میں تیزی سے کام شروع کرنے کے لیے 2 ہفتے کا ٹاسک رکھا گیا ہے، دو ہفتے کے دوران منصوبوں کو شارٹ لسٹ کر کے کام شروع کیا جائے گا، چند منصوبوں کی لیڈ وفاق اور چند کی سندھ حکومت کے پاس ہوگی۔
اسد عمر نے کہا کہ آج کراچی کے 6 مسئلے ایسے ہیں جن پر اتفاق رائے ہوا ہے، سب سے پہلے پینے کے پانی کا مسئلہ حل کرنا ہے، سیوریج کے پانی، کچرا اٹھانے کا کام بھی کرنا ہے، نالوں سے تجاوزات کا خاتمہ اور سڑکوں کو ٹھیک کرنا ہے، شہر میں ٹرانسپورٹ کو بہتر بنانے پر بھی اتفاق رائے ہوا ہے۔
وفاقی وزیر کا کہنا تھا کہ منصوبوں کی فنانسنگ سے متعلق بھی مشاورت کی جائے گی، 2 ہفتے کے دوران طے کیا جائے گا کہ کون سے منصوبے اہم ہیں، 2 ہفتے کے اندر کراچی سے متعلق جامع منصوبہ بندی سامنے آ جائے گی۔
کراچی کے مسائل پر اسلام آباد میں ایک اور بڑی بیٹھک
انھوں نے کہا کہ سیاست بھی چلتی رہے گی، قانون کے مطابق احتساب بھی ہوتا رہے گا، لیکن ملک کی ترقی کے لیے مل کر کام کرتے رہیں گے، وفاق اور صوبائی حکومت میں اتفاق رائے ہوگا تو کام آگے چلے گا۔
اسد عمر کا کہنا تھا کہ لوگوں کے مسائل جلد سے جلد حل کرنا چاہتے ہیں، سندھ حکومت کے ساتھ سیاسی اختلافات ہیں لیکن ترقیاتی کام میں سیاست نہیں ہوگی، بارشوں کے باعث مسائل پیدا ہوئے تو چیئرمین این ڈی ایم اے کو بھیجا گیا، جب دوبارہ بارشیں ہوئیں تو عوام نے دیکھا زیادہ مسائل نہیں ہوئے، کراچی منی پاکستان ہے، جس پر توجہ دینا زیادہ ضروری ہے۔
انھوں نے کہا وزیر اعلیٰ سندھ کی سربراہی میں آج ایک وفد کے ساتھ ملاقات ہوئی، جس میں سندھ حکومت کے ساتھ 6 سیکٹرز میں مل کر کام کرنے پر اتفاق ہوا ہے، کراچی سے متعلق منصوبے بنے ہوئے ہیں لیکن ان پر کام نہیں ہو رہا، طے ہوا کہ ساتھ بیٹھ کر ان منصوبوں پر کام کیا جائے، اس سلسلے میں 6 رکنی کمیٹی بھی بنا دی گئی ہے۔
وفاقی وزیر اسد عمر نے کہا کہ ہفتے کے روز کراچی میں ایک اور ملاقات ہوگی۔
