کیا آپ جانتے ہیں کئی سو سال قبل کی خستہ حال کتابوں اور نسخوں کو کس طرح بحال کر کے دوبارہ پڑھنے کے قابل بنایا جاسکتا ہے؟
فلپائن کی یو ایس ٹی ہیریٹج لائبریری قدیم مخطوطات کو نئے جیسا بنانے کے حوالے سے نہایت مقبول ہے جہاں 5 سو سال یا اس سے بھی قدیم کتابوں کی بحالی و درستگی پر کام کیا جاتا ہے۔
یہ کتابیں نہایت بوسیدہ اور دگرگوں حالت میں ہوتی ہیں۔
کسی کتاب کو درست حالت میں لانے کے لیے سب سے پہلے اس کے صفحات کو ترتیب سے رکھا جاتا ہے۔
پیوریفائیڈ پانی اور کیمیکلز کے ذریعے ہر صفحہ کو دھو کر اس میں سے تیزابی عناصر ختم کیے جاتے ہیں۔
مزید پڑھیں: کتابوں میں چھپی خفیہ مصوری
اس کے بعد کاغذ کو بہتر کرنے کے ایک عمل لیف کاسٹنگ کے ذریعے کاغذ پر موجود سوراخوں اور دھبوں وغیرہ کو ختم کیا جاتا ہے۔ لیف کاسٹنگ کے عمل میں بوسیدہ کاغذ کو خصوصی طور پر تیار کردہ کاغذ کے ساتھ ملا کر کیمیائی اجزا کے پانی سے گزارا جاتا ہے۔
اس عمل سے بوسیدہ کاغذ میں موجود سوراخوں میں دوسرا کاغذ بیٹھ جاتا ہے۔ بعد ازاں اضافی کاغذ کو کاٹ کر نکال دیا جاتا ہے۔
ہر بار دھونے کے بعد ایک ایک صفحے کو خشک کیا جاتا ہے جس کے بعد ان صفحات کو ٹشو پیپر سے لپیٹ دیا جاتا ہے۔
اب صفحے بہترین حالت میں آجاتے ہیں جس کے بعد انہیں نئی جلد سازی کر کے نئی نکور کتاب بنادی جاتی ہے۔
ماہرین کے مطابق پرانے مخطوطات، کتب، اور نسخے تعلیمی اور تحقیقی مقاصد میں طلبا اور دیگر افراد کے لیے مددگار ثابت ہوسکتے ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
