اسلام آباد: کرونا ویکسین کی خریداری کے لیے پاکستان کے عالمی سطح پر رابطے جاری ہیں، ذرائع کا کہنا ہے کہ پاکستان کے کرونا ویکسین کی خریداری سے متعلق 2 اہم مطالبات ہیں۔
تفصیلات کے مطابق پاکستان کرونا ویکسین کی خریداری کے لیے 4 ممالک کی 6 کمپنیوں سے رابطے میں ہے، پاکستان کی جانب سے اس سلسلے میں دو اہم مطالبات ہیں۔
پاکستان ڈبلیو ایچ او کے ای یو اے سرٹیفکیٹ کی حامل ویکسین خریدے گا، اور ویکسین جلد فراہم کرنے والی کمپنی ہی سے کرونا ویکسین خریدے گا۔
ذرائع کا کہنا ہے کہ ویکسین کے لیے چینی کمپنیوں سائینو فارم اور کین سائینو سے رابطے جاری ہیں، آکسفورڈ یونی ورسٹی اور روسی اسپوتنک فائیو کمپنی سے بھی رابطے ہو رہے ہیں۔
پاکستان نے مفت اور رعایتی کرونا ویکسین کے لیے رجوع کرلیا
وزارت صحت کے ذرائع نے بتایا کہ پاکستان کی چھ ویکسین ساز کمپنیوں سے جو بات چیت جاری ہے وہ مشروط ہے، ان کمپنیوں کی کرونا ویکسین پروفائل پر غور کیا جا رہا ہے۔
یاد رہے کہ چند دن قبل پاکستان نے مفت اور رعایتی کرونا ویکسین حاصل کرنے کے لیے ایمونائزیشن اور ویکسی نیشن کے عالمی ادارے گاوی کو خط لکھا تھا۔
ذرائع وزارت صحت کا کہنا تھا کہ پاکستان نے 20 فی صد آبادی کے لیے مفت جب کہ 20 فی صد آبادی کے لیے رعایتی قیمت پر کرونا وائرس ویکسین مانگی ہے۔
