چنیوٹ: سوشل میڈیا پر اپنی حیرت انگیز ڈگریوں اور القابات سے شہرت پانے والے دنیا کے سب سے بڑے جعلی ڈاکٹر کو چنیوٹ کے محکمہ صحت اور پولیس نے مشترکہ کارروائی کرتے ہوئے گرفتار کرلیا ہے۔
تفصیلات کے مطابق سوشل میڈیا پر خود کو دنیا کا سب سے بڑا سائنسداں کہنے والے جعل ساز کو محکمہ صحت اور چنیوٹ پولیس نے ڈگریاں اسناد جعلی ثابت ہونے پر حراست میں لیا ہے ، کارروائی ملزم کی جانب سے سوشل میڈیا پر ہر مرض کا دس منٹ میں علاج کرنے کے دعوے پر عمل میں آئی۔
پروفیسر ڈاکٹر آر یو عمران احمد سائنسدان کے نام سے سوشل میڈیا پر تشہیری مہم کرنے اور کلینک بنا کر سادہ لوح شہریوں کو دونوں ہاتھوں سے لوٹتے ہوئے انہیں موت کی وادی میں دھکیلنے کا دھندہ کر رہا تھا ۔
ذرائع کا کہنا ہے کہ جعلی پروفیسر ڈاکٹر آر یو عمران چنیوٹ کے مین بازار گلی اصلاح سکول میں سادہ لوح شہریوں کو کلینک بنا کر گمارہ کرتے ہوئے لوٹ مار کر رہا تھا ۔میڈیا کی نشاندہی پر محکمہ صحت چنیوٹ کے حکام اور پولیس نے ایکشن لیا اور سادہ لوح شہریوں کو بیوقوف بنانے کی غرض سے خود کو بڑھا چڑھا کر سوشل میڈیا پر اپنی مہم چلانے والے ملزم کو گرفتار کر لیا ہے۔
یہاں یہ بات قابل ذکر ہے کہ مذکورہ نام نہاد سائنس داں پروفیسر اور ڈاکٹرکا کارڈ اتنا دلچسپ تھا کہ سوشل میڈیا پر خوب وائرل ہوا، کارڈ میں ملزم نے خود کو اصلی ڈاکٹری کرنے والا دنیا کا سب سے بڑا ڈاکٹر لکھا تھا ۔ متعلقہ افسران کا کہنا ہے کہ یہ شخص دنیا کی ہر بیماری کا علاج دس منٹ میں کرنے کا دعوی کرتا ہے۔
ملزم کا یہ بھی دعویٰ تھا کہ اسے دس بار نوبل انعام مل چکا ہے جبکہ چالیس بار سعودی عرب کا شاہ فیصل ایوارڈ بھی دیا گیا ہے۔
