The news is by your side.

Advertisement

جائیداد کے کاغذات کی آن لائن جانچ پڑتال، بورڈ آف ریونیو نے سسٹم متعارف کرادیا

کراچی: بورڈ آف ریونیو سندھ نے زمینوں پر قبضے اور جعلی کاغذات کی خرید و فروخت روکنے کے لیے آن لائن سسٹم متعارف کرادیا جس کے تحت جائیداد کے کاغذات کی تصدیق گھر بیٹھے کی جاسکے گی۔

سندھ بورڈ آف ریونیو نے زمینوں پر قبضے اور جعلی کاغذات کی روک تھام کے لئے بڑا فیصلہ کیا جس کے تحت جائیداد خریدنے سے قبل زمین کے آن لائن کاغذات کی جانچ پڑتال 150 روپے کی فیس ادا کر کے کی جاسکے گی۔

ممبر بورڈ آف ریونیو سندھ علی شیخ کا کہنا تھا کہ دستاویزات کی جانچ کے لیے رجسٹرار کو وقت کو تین ماہ سے کم کر کے تین دن کردیا گیا، اگر کسی سب رجسٹرار نے جائیداد کے کاغذات کی منتقلی 3 روز میں نہیں کی تو سخت کارروائی کی جائے گی۔

اُن کا کہنا تھا کہ آن لائن سسٹم اور نئے قوانین سے متعلق ایک ہفتے میں باضابطہ نوٹی فکیشن جاری کردیا جائے گا، قبل ازیں زمین کے کاغذات کی رجسٹریشن میں 7 ماہ کا وقت لگتا تھا تاہم اب کم کر کے اسے 17 دن کردیا گیا۔

علی شیخ کا کہنا تھا کہ سندھ کی تمام جائیداد کی دستاویزات آن لائن چیک کی جاسکیں گی، اب تک سسٹم کے ذریعے 60 ہزار سے زائد جعلی پلاٹس کا انکشاف ہوا جنہیں تین ماہ میں درست کرلیا جائے گا۔

مزید پڑھیں: کراچی میں جائیدادوں کی منتقلی پر ایف بی آر کو اضافی ٹیکس دینا ہوگا

ممبر بورڈ آف ریونیو کا کہنا تھا کہ اب شہریوں زمین کی جانچ پڑتال کے لیے پریشان ہونے کی ضرورت نہیں کیونکہ پورے سندھ کا ڈیٹا آن لائن کردیا گیا، دوسرا مرحلہ مکمل ہونے کے بعد گھر بیٹھے زمین کے کاغذات کی جانچ پڑتال ہوسکے گی۔

اُن کا کہنا تھا کہ کراچی کا 70 فیصد حصہ بورڈ آف ریونیو کو جاتا ہے، کراچی ڈیولپمنٹ اتھارٹی، کراچی میونسپل کارپوریشن، ایل ڈی اے سمیت دیگر اداروں کو بھی ڈیفنس ہاؤسنگ اتھارٹی کی طرح ڈیجیٹلائز کریں گے ۔

یہ بھی پڑھیں: جائیداد ٹیکس کی وصولی کے لیے عدالتیں قائم کرنے کا فیصلہ

انہوں نے بتایا کہ تمام ڈیٹا سامنےآنے پر ایک پراپرٹی کے دو کاغذات کی شکایت بھی فوری ختم کردی جائے گی، اب میر پور خاص یا مٹھی کی پراپرٹی کے کاغذات بھی کراچی میں بیٹھ کر چیک کئے جا سکتے ہیں۔

Comments

comments

یہ بھی پڑھیں