تہران: ایران کے دارالحکومت تہران میں بھارتی سفارت خانے کے باہر طلباء سمیت ایرانیوں اور کشمیریوں کی بڑی تعداد نے بھارت کی خلاف احتجاجی مظاہرہ کیا۔
تفصیلات کے مطابق تہران میں مظاہرین نے بھارت کی طرف سے دفعہ 370 کی منسوخی کے حالیہ اقدام کی مذمت کے لیے احتجاج کیا۔
غیر ملکی خبر رساں ادارے کے مطابق مقبوضہ کشمیر میں دفعہ 370 کے تحت کشمیریوں کو خصوصی حیثیت حاصل تھی۔ مظاہرین مقبوضہ کشمیر کے مظلوم عوام کے ساتھ اظہار یکجہتی کیا۔
انہوں نے عالمی برداری کی توجہ مقبوضہ کشمیر کی سنگین صورتحال کی طرف مبذول کرائی۔ مظاہرین نے بینرز اور پلے کارڈز اٹھا رکھے تھے جن پر ”کشمیر کشمیریوں کا ہے، کشمیری عوام کو ہی اپنے مستقبل کا فیصلہ کرنے حق حاصل ہے اور کشمیر سلگ رہا ہے جبکہ عالمی برادری سو رہی ہے “جیسے نعرے درج تھے۔
کشمیر کے اسٹیٹس کا فیصلہ یو این چارٹر کے مطابق ہوگا: سیکرٹری جنرل یو این
دوسری جانب اقوام متحدہ کے سیکریٹری جنرل کا مقبوضہ کشمیر کی صورت حال پر اہم ترین بیان آ گیا ہے، ان کا کہنا ہے کہ کشمیر کے اسٹیٹس کا فیصلہ یو این چارٹر کے مطابق ہوگا۔
اقوام متحدہ کے سیکریٹری جنرل نے مقبوضہ کشمیر میں انسانی حقوق کی خلاف ورزی پر تشویش کا اظہار کرتے ہوئے کہا ہے کہ ہم وادی کی صورت حال کا جائزہ لے رہے ہیں۔