برمنگھم: مظلوم کشمیریوں سے اظہاریکجہتی اور بھارتی جارحیت کے خلاف دنیا بھر میں مظاہروں کا سلسلہ جاری ہے۔
تفصیلات کے مطابق مقبوضہ وادی میں کرفیو کے باعث نظام زندگی درہم برہم ہے، جس پر دنیا بھر میں لوگ مظلوم کشمیریوں سے یکجہتی کا اظہار کررہے ہیں۔
غیر ملکی خبررساں ادارے کے مطابق برطانوی شہر برمنگھم میں 27اکتوبر کو کشمیریوں سے اظہار یکجہتی کے لیے مارچ ہوگا، جس کے لیے تمام تیاریاں مکمل کرلی گئی ہیں۔
منتظمین کا کہنا ہے کہ کشمیریوں کی پُرامن جہدوجہد سے بھارت کی نیندیں اُڑچکی ہیں، بھارت کو مقبوضہ وادی میں کشمیریوں پر مظالم بند کرنا ہوں گے۔
دوسری جانب برطانوی دارالحکومت لندن میں سکھ فار جسٹس اور کشمیری رہنماؤں نے مشترکہ پریس کانفرنس کرتے ہوئے یکم نومبر کو اقوام متحدہ کے سامنے مشترکہ مظاہرے کا اعلان کیا ہے۔
خیال رہے کہ آرٹیکل 370 کی منسوخی کے بعد مقبوضہ کشمیر میں ظلم وبربریت کا سلسلہ تاحال جاری ہے، وادی میں اسکول، کالج اور تجارتی مراکز بھی بند پڑے ہیں۔
بھارتی جارحیت، یکم نومبر کو اقوام متحدہ کے سامنے مظاہرے کا اعلان
وادی میں لاک ڈاؤن کے باعث کشمیریوں کو شدید مشکلات کا سامنا ہے۔ کرفیو اور پابندیوں کے باعث اب تک مقامی معیشت کو ایک ارب ڈالر کا نقصان ہوچکا ہے جبکہ ہزاروں لوگ بے روزگار ہوچکے ہیں۔
مواصلاتی نظام کی بندش سے کشمیری شدید ذہنی اذیت کا شکار ہیں جبکہ گھروں میں ادویات اور کھانے کا ذخیرہ ختم ہونے کے باعث موت آہستہ آہستہ کشمیریوں کی طرف بڑھ رہی ہے۔
