site
stats
پاکستان

نئی دہلی: ہندو انتہا پسندوں کا پاکستانی ہائی کمیشن کا گھیراؤ

نئی دہلی: بھارتی جاسوس کلبھوشن یادیو کی سزائے موت کا اعلان ہونے کے بعد بھارتی انتہا پسند ایک بار پھر پاکستان کے خلاف بے قابو ہوگئے۔ نئی دہلی میں انتہا پسندوں نے پاکستانی ہائی کمیشن کا گھیراؤ کرلیا اور پاکستان کے خلاف نعرے لگائے۔

تفصیلات کے مطابق بھارتی جاسوس کلبھوشن یادیو کی سزا کے اعلان کے بعد بھارت میں انتہا پسند ایک بار پھر پاکستان کے خلاف بے قابو ہو گئے۔

بھارتی دارالحکومت نئی دہلی میں ہندو انتہا پسندوں نے پاکستانی ہائی کمیشن کا گھیراؤ کرلیا۔ مظاہرین نے کلبھوشن کی پھانسی کے خلاف سخت احتجاج کیا اور پاکستان کے خلاف شدید نعرے بازی کی۔

انتہا پسندوں کے احتجاج کے بعد بھارت میں مقیم پاکستانی سفارتی عملے کو سخت خطرات لاحق ہوگئے ہیں۔ سفارتی عملے کی حفاظت کرنا بھارتی حکام کی ذمہ داری ہے جو اس میں ناکام نظر آرہے ہیں۔

یاد رہے کہ گزشتہ روز پاک فوج کے شعبہ تعلقات عامہ آئی ایس پی آر کے مطابق کلبھوشن کو فیلڈ جنرل کورٹ مارشل کی جانب سے پاکستان میں جاسوسی اور انتشار پھیلانے پر سزائے موت سنائی گئی۔ بھارتی جاسوس کا مقدمہ آرمی ایکٹ کے تحت فیلڈ جنرل کورٹ مارشل میں چلایا گیا تھا۔

مزید پڑھیں: پاکستان میں گرفتار ہونے والے 9 بھارتی جاسوس

پھانسی کے اعلان کے بعد بھارتی وزارت خارجہ نے نئی دہلی میں تعینات پاکستانی ہائی کمشنر عبدالباسط خان کو بھی طلب کیا تاہم پاکستانی ہائی کمشنر نے بھارت کے تمام اعتراضات مسترد کردیے۔

عبد الباسط نے وزارت خارجہ میں طلبی پر شدید رد عمل ظاہر کرتے ہوئے طلبی کو غیر منطقی قرار دیا۔ انہوں نے کہا کہ کلبھوشن یادیو دہشت گردی بھی پاکستان میں کرے اور وزارت خارجہ میں طلب بھی پاکستانی ہائی کمشنر کو کیا جائے۔

ان کا کہنا تھا کہ کلبھوشن یادیو پاکستان میں تخریبی کارروائیوں میں ملوث رہا جس کا اس نے اعتراف بھی کیا۔ پاکستان نے سزا سنا کر کوئی غلط کام نہیں کیا۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top