کراچی : سانحہ مچھ کے خلاف نمائش چورنگی سمیت شہر 15 مقامات کو دھرنوں کے باعث بند کردیا گیا، ٹریفک کی روانی بحال رکھنے کیلئے علاقوں میں ٹریفک اہلکاروں کی بھاری نفری تعینات کرنے کا فیصلہ کرلیا۔
تفصیلات کے مطابق ہفتے کی شب رونما ہونے والے سانحہ مچھ کے خلاف ملک بھر کی طرح شہر کراچی میں بھی احتجاج و دھرنوں کا سلسلہ جاری ہے، شہر قائد میں نمائش چورنگی سمیت 15 مقامات پر اس وقت دھرنے جاری ہیں۔
ٹریفک حکام کا کہنا ہے کہ عائشہ منزل ، نیو رضویہ، صفورہ چورنگی اور کامران چورنگی پر دھرنا جاری ہے جبکہ شارع فیصل اسٹار گیٹ، ملیر 15، ناتھا خان پل، نیپا پل پر مظاہرین موجود ہیں اور نارتھ کراچی پاور ہاؤس چورنگی کو بھی احتجاج کے سبب بند کردیا گیا ہے۔
احتجاج و دھرنوں کے باعث سڑکیں بلاک اور ٹریفک کی روانی متاثر بری طرح متاثر ہوچکی ہے، ٹریفک پولیس کا کہنا ہے کہ ٹریفک کو متبادل راستوں پر موڑا جارہا ہے۔
ٹریفک حکام کا کہنا ہے کہ کوشش ہے متبادل راستے فراہم کرکے ٹریفک کی روانی کو بحال رکھا جائے اور اس مقصد کےلیے علاقوں میں ٹریفک اہلکاروں کی بھاری نفری تعینات کررہے ہیں۔
