ایچ بی ایل پاکستان سپر لیگ سیزن 8 کا پہلا مرحلہ دو میچز کے انعقاد کے ساتھ آج اختتام پذیر ہو جائے گا پلے آف مرحلے کا آغاز 15 مارچ سے ہوگا۔
اے آر وائی نیوز کے مطابق پاکستان میں کرکٹ کے سب سے بڑے میلے ایچ بی ایل پی ایس ایل سیزن 8 اپنے اختتام کی جانب گامزن ہے۔ رواں سیزن کے آج دو میچز کھیلے جائیں گے جس کے ساتھ ہی سنسنی خیز، اعصاب شکن اور دلچسپ لمحات سے بھرپور میچز پر مشتمل پہلا مرحلہ اختتام پذیر ہوجائے گا۔
پی ایس ایل میں آج ہوگا ڈبل دھمال، پنڈی کرکٹ اسٹیڈیم میں ڈے میچ میں اسلام آباد یونائیٹڈ اور پشاور زلمی ٹکرائیں گے۔ میچ دوپہر 2 بجے کھیلا جائے گا۔ قذافی اسٹیڈیم لاہور میں قلندرز روایتی حریف کراچی کنگز کا سامنا کریں گے یہ میچ شام 7 بجے شروع ہوگا۔
رواں ایونٹ کے پلے آف مرحلے کا آغاز دو روز کے وقفے کے بعد 15 مارچ سے لاہور میں ہوگا۔ اس مرحلے میں پہنچنے والی چاروں ٹیموں کا فیصلہ ہوگیا ہے۔ لاہور قلندرز، ملتان سلطانز، اسلام آباد یونائیٹڈ اور پشاور زلمی ایک دوسرے کے مدمقابل ہوں گی۔
اسلام آباد آج کے میچ میں جیت اسے دوسری پوزیشن دلا سکتی ہے جس پر ملتان سلطانز براجمان ہے۔ تاہم ہار بھی پشاور زلمی کو پلے آف کھیلنے سے نہیں روک سکے گی کیونکہ گزشتہ روز کوئٹہ کی شکست نے اسے اس مرحلے تک پہنچنے میں مدد فراہم کی۔
دوسرے میچ میں روایتی حریف کراچی اور لاہور مدمقابل ہوں گے۔ قلندرز ہوم گراونڈ پر کنگز سے بدلہ لینے کا عزم لے کر اتریں گے تو کراچی کنگز بھی ایونٹ کا آخری میچ جیت کر ٹورنامنٹ کا اچھے سائن کے ساتھ اختتام کرنے کے لیے تمام صلاحیتوں کو بروئے کار لائیں گے۔
