پاکستان سپر لیگ 7 کے 14ویں میچ میں اسلام آباد یونائیٹڈ نے کراچی کنگز کو 42 رنز سے شکست دے دی۔
کراچی کے نیشنل اسٹیڈیم میں کھیلے گئے میچ میں یونائیٹڈ کے 178 رنز کے تعاقب میں ہوم ٹیم مقررہ 20 اوورز میں 9 وکٹوں پر 135 رنز ہی بنا سکی۔ ایونٹ میں کراچی کنگز کی یہ مسلسل پانچویں شکست ہے اور ہوم ٹیم اب تک جیت کا کھاتا نہیں کھول سکی۔
مڈل آرڈر بلے باز محمد نبی 47 رنز کے ساتھ ناٹ آؤٹ رہے جب کہ کپتان بابراعظم صرف 8 رنز ہی بنا سکے، صاحبزادہ فرحان نے 25 اور عمید آصف نے 10 رنز کا اضافہ کیا۔ یونائیٹڈ کے کپتان شاداب خان نے زبردست بولنگ کا مظاہرہ کرتے ہوئے 4 کھلاڑیوں کو آؤٹ کیا۔
اس سے قبل اسلام آباد کے کپتان شاداب خان نے ٹاس جیتا اور بیٹنگ کو ترجیح دی۔ ایلکس ہیلز اور اسٹرلنگ پر مشتمل اوپننگ جوڑی نے 66 رنز کا عمدہاس آغاز فراہم کیا جب کہ کپتان شاداب خان نے 19 گیندوں پر 34 رنز کی جارحانہ اننگز کھیلی۔
اسلام آباد یونائیٹڈ نے مقررہ 20 اوورز میں 6 وکٹوں پر 177 رنز بنائے۔ کولن منرو نے33 رنز بنائے جب کہ اعظم خان نے7گیندوں پر16 رنز کی باری کھیلی۔
کراچی کنگز کی جانب سے کرس جارڈن نے 2 کھلاڑیوں کو آؤٹ کیا۔ عماد وسیم، عمیدآصف، عثمان شنواری اور محمد نبی نے 1،1وکٹ حاصل کی۔
Phir se ball bahir bhejni hai? 🙂@MAzamKhan45 developing a habit. #HBLPSL7 l #LevelHai l #KKvIU pic.twitter.com/Z8nt3LbZxq
— PakistanSuperLeague (@thePSLt20) February 6, 2022
لیگ کے پہلے مرحلے کا آخری میچ پیر کو کوئٹہ گلیڈی ایٹرز اور لاہور قلندرز کے مابین کھیلا جائے گا۔ لیگ کا دوسرا مرحلہ 10 فروری سے قذافی اسٹیڈیم لاہور میں شروع ہوگا۔
ٹاس کے موقع پر یونائیٹڈ کے کپتان شاداب خان نے کہا کہ کوشش کریں گے مثبت کھیلیں اور اچھا ٹوٹل دیں جب کہ کنگز کے کپتان بابراعظم نے کہا کہ اچھی کرکٹ کھیل کر شائقین کو محظوظ کریں گے۔
کراچی کنگز کی ٹیم میں 2 تبدیلیاں کی گئی ہیں۔ فاسٹ بولر کرس جارڈن کنگز کی ٹیم میں شامل ہوئے ہیں جب کہ عمران جونیئر اور عامریامین کی جگہ کرس جارڈن اور عثمان شنواری ٹیم کا حصہ بنے ہیں۔
ہوم ٹیم کراچی کنگز ٹورنامنٹ میں واپسی کا عزم لیے میدان میں اتری ہے۔ کراچی کنگز کے شائقین نے بلے بازی میں کپتان بابراعظم اور جارح مزاج بلے باز شرجیل خان سے امیدیں لگالیں ہیں جبکہ فاسٹ بولر کرس جارڈن اور عثمان شنواری کی فائنل الیون میں شمولیت سے کراچی کنگز کا بولنگ اٹیک مضبوط ہوگیا ہے۔
گذشتہ روز لاہور قلندرز کے ہاتھوں شکست کے بعد اسلام آباد یونائیٹڈ کا بھی باؤنس بیک ہدف ہوگا۔ دونوں ٹیموں میں اب تک سولہ مقابلے ہوئے اسلام آباد کو دس فتوحات کےساتھ برتری حاصل ہے جبکہ کراچی کنگز نےچھ بارکامیابی سمیٹی۔
