لاہور: پاکستان سپر لیگ (پی ایس ایل ) سیزن 7 میں سنسنی خیز مقابلوں کا سلسلہ جاری ہے، ایونٹ میں آج مزید ایک میچ کا فیصلہ ہوگا۔
تفصیلات کے مطابق قذافی اسٹیڈیم لاہور میں آج اسلام آباد یونائیٹڈ اور پشاور زلمی آمنے سامنے ہوں گی، پوائنٹس ٹیبل پر یونائیٹڈ کا تیسرا جبکہ زلمی کا چوتھا نمبر ہے، میچ شام ساڑھے 7 بجے شروع ہوگا۔
اسلام آباد یونائیٹڈ کے لئے بُری خبر یہ ہے کہ شاداب خان گروئن انجری اور ذیشان ضمیر سائیڈ اسٹرین کا شکار ہونے کے باعث آج کے میچ سے باہر ہوگئے ہیں۔
شاداب خان کی عدم موجودگی میں مڈل آرڈر بلے باز محمد آصف ٹیم کے کپتان ہونگے، اگلے میچز میں شاداب خان کی ٹیم میں واپسی کا فیصلہ ان کی میڈیکل رپورٹ کی بنیاد پر کیا جائے گا۔
یہ بھی پڑھیں: محمد رضوان کا جیت کے باوجود شکوہ
پوائنٹس ٹیبل پر ملتان سلطانز کی ٹیم 14پوائنٹس کے ساتھ پہلے نمبر پر جبکہ لاہور قلندرز کی ٹیم 10 پوائنٹس کے ساتھ دوسرے نمبر پر ہے۔
ٹیبل پر اسلام آباد یونائیٹڈ اور پشاور زلمی کے 8، 8 پوائنٹس ہیں جبکہ نیٹ رن ریٹ کی وجہ سے یہ بالترتیب تیسرے اور چوتھے نمبر پر ہیں اور کوئٹہ گلیڈی ایٹرز 6 پوائنٹس کے ساتھ پانچویں نمبر پر ہیں۔
