site
stats
پاکستان

پاک سرزمین پارٹی کا ایم کیو ایم کی آل پارٹیز کانفرنس میں شرکت کا اعلان

کراچی: پاک سرزمین پارٹی نے متحدہ قومی موومنٹ کی کل جماعتی کانفرنس میں شرکت کا اعلان کردیا۔ اے پی سی کل بروز منگل منعقد ہوگی۔

تفصیلات کے مطابق عامر خان کی قیادت میں ایم کیو ایم پاکستان کے وفد نے پاک سرزمین پارٹی کے دفتر کا دورہ کیا جہاں ڈاکٹر صغیراحمد اور انیس ایڈووکیٹ نے ان کا استقبال کیا۔

ملاقات میں گفت و شنید کے بعد پاک سرزمین پارٹی نے ایم کیو ایم کی آل پارٹیز کانفرنس میں شرکت کا اعلان کردیا۔

بعد ازاں دونوں پارٹیوں کے رہنماؤں نے مشترکہ پریس کانفرنس کی جس میں پاک سرزمین پارٹی کے رہنما انیس ایڈوکیٹ نے کہا کہ کل یوم نجات منائیں گے۔

یاد رہے کہ 22 اگست کو ایک سال قبل قائد متحدہ کی اشتعال انگیز تقریر کے بعد ایم کیو ایم کے مشتعل کارکنان نے اے آر وائی نیوز کے دفتر پر حملہ کردیا تھا۔

مزید پڑھیں: اے آر وائی نیوز کے دفتر پر ایم کیو ایم کارکنان کا حملہ

مظاہرین نے دفتر میں شدید توڑ پھوڑ کی، سیکیورٹی عملے کو تشدد کا نشانہ بنایا جبکہ خواتین سمیت دفتر میں موجود ملازمین کو ہراساں کیا گیا۔

واقعے کے بعد ایم کیو ایم رہنماؤں نے اپنے قائد کے بیان سے لاتعلقی کا اظہار کردیا جس کے بعد متحدہ قومی موومنٹ دو دھڑوں، ایم کیو ایم پاکستان اور ایم کیو ایم لندن میں تقسیم ہوگئی۔

انیس ایڈوکیٹ کا مزید کہنا تھا کہ ایم کیو ایم پاکستان یقیناً غدار وطن کے خلاف کوئی واضح مؤقف سامنے لائے گی۔ ایم کیو ایم پاکستان کی بقا اسی میں ہے کہ غدار وطن سے لاتعلقی اختیار کرے۔

انہوں نے کہا کہ ملک سے غداری اور بغاوت کرنے والوں کو منطقی انجام تک پہنچایا جائے، ایسے غدار وطن کو بے نقاب کرنا ضروری ہے۔

بعد ازاں ایم کیو ایم رہنما عامر خان نے متنازع گفتگو سے پرہیز کا مشورہ دیتے ہوئے کہا کہ ندن سے لا تعلقی کر چکے ہیں اور بس اتنا کافی ہے۔

انہوں نے کہا کہ کل اے پی سی میں کرپشن سے متعلق متفقہ لائحہ عمل اپنایا جائے گا۔

عامر خان کا مزید کہنا تھا کہ شہر کی بہتری کے لیے 2 پارٹیاں قریب آرہی ہیں تو یہ باعث مسرت ہے۔ جب ساتھ کھڑے ہیں تو ماضی کی تمام باتوں کو بھول جاناچاہیئے۔

ایم کیو ایم رہنما فیصل سبزواری کا گفتگو کرتے ہوئے کہنا تھا کہ مہاجر قاتل اور مہاجر مقتول کی سیاست نہیں ہونے دیں گے۔ قومی ایجنڈے پر سیاسی جماعتوں کو گفتگو جاری رکھنا چاہیئے۔ ہم سب کے پاس وطن عزیز کو مضبوط بنانے کے لیے پیغام لے کر جا رہے ہیں۔


آفاق احمد سے ملاقات

بعد ازاں ایم کیو ایم کے وفد نے مہاجر قومی موومنٹ (حقیقی) کے چیئرمین آفاق احمد سے بھی ملاقات کی۔

ملاقات میں آفاق احمد کو اے پی سی میں شرکت کی دعوت دی گئی جسے انہوں نے قبول کرلیا۔

اس موقعے پر عامر خان کا کہنا تھا کہ معاملات بہتر بنانے کے لیے مل کر آواز اٹھانے کی ضرورت ہے۔ سیاسی نظریات اپنی جگہ لیکن ایشوز اور قومی ایجنڈے پر متحد ہیں۔

انہوں نے کہا کہ کل آل پارٹیز کانفرنس میں بلدیاتی اداروں کو اختیارات کے لیے بات ہوگی۔


Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top