کراچی: پاکستان تحریک انصاف (پی ٹی آئی) نے سندھ ہائیکورٹ میں بھی ایڈمنسٹریٹرز کی تقرری کو چیلنج کر دیا۔
تفصیلات کے مطابق پی ٹی آئی نے الیکشن شیڈول کے بعد سیاسی بنیادوں پر ایڈمنسٹریٹرز کی تقرری کو سندھ ہائی کورٹ میں چیلنج کر دیا ہے۔
پی ٹی آئی کراچی کے صدر اور ایم پی اے بلال غفار نے شہاب امام ایڈووکیٹ کے توسط سے عدالت میں درخواست دائر کی ہے، جس میں کہا گیا ہے کہ فرقان اطیب، شکیل اور محمد شریف کو کراچی کے مختلف اضلاع میں ایڈمنسٹریٹرز تعینات کیا گیا ہے، یہ افسران متحدہ قومی موومنٹ کی رابطہ کمیٹی کے بھی ارکان ہیں۔
درخواست گزار کے مطابق ان افسران کی سیاسی بنیادوں پر تقرری بلدیاتی انتخابات پر اثر انداز ہونے کی کوشش ہے۔
الیکشن کمیشن کے حکم پر سندھ حکومت نے ایم کیو ایم کی فرمائش پر لگائے گئے ایڈمنسٹریٹرز کو ہٹا دیا
درخواست میں کہا گیا ہے کہ سیف الرحمان کو کراچی کا ایڈمنسٹریٹر بھی تبادلے و تقرریوں پر پابندی کی مدت میں تعینات کیا گیا ہے، حکومت سندھ متحدہ قومی موومنٹ کے ساتھ مل کر انتخابی قوانین کی دھجیاں بکھیر رہی ہے۔
درخواست گزار نے عدالت سے استدعا کی ہے کہ انتخابی قوانین سے متصادم یہ تعیناتیاں غیر قانونی اور کالعدم قرار دی جائیں۔ کیس میں طلب کیے گئے چیف سیکریٹری اور سیکریٹری بلدیات ذاتی طور پر عدالت میں پیش ہوئے، درخواست پر سماعت کرنے کے بعد سندھ ہائیکورٹ نے 4 جنوری کے لیے نوٹس جاری کر دیے۔
