لاہور : پنجاب میں الیکشن کی تاریخ کیلئے تحریک انصاف نے لاہور ہائیکورٹ سے رجوع کر لیا، جس میں استدعا کی عدالت تاریخ کیلئے گورنر کو ہدایات جاری کرے۔
تفصیلات کے مطابق تحریک انصاف نے پنجاب میں الیکشن کی تاریخ کیلئے لاہور ہائیکورٹ میں درخواست دائر کردی۔
بیرسٹر علی ظفر کےذریعے سے لاہور ہائیکورٹ میں درخواست دائر کی گئی ، جس میں گورنر پنجاب کو بذریعہ سیکرٹری فریق بنایا گیا ہے۔
درخواست میں کہا آئین کے تحت اسمبلی تحلیل کے فوری بعد گورنر نے الیکشن کا اعلان کرنا ہے، گورنر پنجاب الیکشن کی تاریخ کا اعلان نہیں کر رہے جو کہ آئینی خلاف ورزی ہے۔
تحریک انصاف کا کہنا تھا کہ 10دن سے زائد ہوچکے،گورنر پنجاب نے الیکشن کی تاریخ کا اعلان نہیں کیا ، وہ اپنے حلف کی خلاف ورزی کر رہے ہیں۔
درخواست میں استدعا کی گئی کہ لاہور ہائی کورٹ پنجاب میں الیکشن کی تاریخ کیلئے گورنر کو ہدایات جاری کرے۔
