تحریک انصاف کے وفد کی اختر مینگل سے ملاقات -
The news is by your side.

Advertisement

تحریک انصاف کے وفد کی اختر مینگل سے ملاقات

کوئٹہ: تحریک انصاف کے وفد نے بلوچستان نیشنل پارٹی کے وفد سے ملاقات کی۔ تحریک انصاف کے رہنما نعیم الحق کا کہنا تھا کہ عمران خان نے بلوچستان کے مسائل حل کرنے کا وعدہ کیا ہے۔

تفصیلات کے مطابق پاکستان تحریک انصاف کے وفد نے بلوچستان میں بلوچستان نیشنل پارٹی کے وفد سے ملاقات کی۔ تحریک انصاف کے وفد میں نعیم الحق اور سردار یار محمد رند شامل تھے۔

دوسری جانب بی این پی کے وفد کی سربراہی اختر مینگل نے کی۔

ملاقات کے بعد میڈیا سے گفتگو کرتے ہوئے اختر مینگل نے کہا کہ بلوچستان کے مسائل کے حل میں حکومت نے توجہ نہیں دی۔

انہوں نے کہا کہ تحریک انصاف کے دوستوں کو مطالبے پیش کردیے ہیں۔ لاپتہ افراد کی بازیابی کے لیے اقدامات، مہاجرین کی واپسی اور وسائل کی منصفانہ تقسیم کا مطالبہ رکھا ہے۔

اختر مینگل نے کہا کہ آئندہ حکومت نے بھی بلوچستان کو نظر انداز کیا تو اتحاد بے معنی ہوگا۔

انہوں نے کہا کہ آل پارٹیز کانفرنس کے لیے ہمیں باضابطہ دعوت نامہ نہیں ملا، اے پی سی میں بلایا گیا تو اپنے مطالبات سامنے رکھیں گے۔ ’جو کوئی بھی بلوچستان کے مسائل حل کرے گا ہم ساتھ دیں گے‘۔

تحریک انصاف کے رہنما نعیم الحق نے کہا کہ اختر مینگل کے ساتھ مثبت اور اچھی ملاقات ہوئی ہے۔ عمران خان اور اختر مینگل ایک عرصے سے رابطے میں ہیں۔

انہوں نے کہا کہ حکومت کی ذمہ داری ہوگی بلوچستان کے مسائل حل کیے جائیں، عمران خان نے بلوچستان کے مسائل حل کرنے کا وعدہ کیا ہے۔

انہوں نے کہا کہ کوشش ہے سردار اختر مینگل کی عمران خان سے آج ہی ملاقات ہو۔ بلوچستان کے عوام نے بہت قربانیاں دی ہیں۔ عمران خان کی قیادت میں بلوچستان کو ترقی دیں گے۔

تحریک انصاف کے رہنما یار محمد رند کا کہنا تھا کہ پاکستان کا مستقبل بلوچستان سے وابستہ ہے۔ عمران خان سمجھتے ہیں بلوچستان کو نظرانداز کر کے وژن پورا نہیں ہوسکتا۔

انہوں نے کہا کہ امید ہے بلوچستان کے بہتر مستقبل کے لیے اختر مینگل ہمارا ساتھ دیں گے۔ ’بی اے پی جسے وزیر اعلیٰ کے لیے نامزد کرے گی ہم اس کی حمایت کریں گے‘۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں