این اے 122 : نواز شریف صرف دھاندلی کرسکتے ہیں، عمران خان -
The news is by your side.

Advertisement

این اے 122 : نواز شریف صرف دھاندلی کرسکتے ہیں، عمران خان

لاہور: پاکستان تحریک انصاف آج این اے 122 کی انتخابی مہم کا آخری جلسہ کررہی ہے جس سے خطاب کرتے ہوئے عمران خان کا کہنا تھا کہ نواز شریف صرف دھاندلی کرسکتے ہیں۔

تحریک انصاف نے آج لاہورکے علاقے مزنگ میں اپنی سیاسی طاقت کا اظہارکیا اس موقع پرپارٹی کارکنان کی کثیرتعداد موجود تھی۔

مزنگ کے علاقے قرطبہ چوک پرانتخابی جلسے میں تحریک انصاف کے سربراہ عمران خان کے علاوہ شاہ محمود قریشی، جہانگیرترین، چوہدری سروراورعلیم خان موجود ہیں۔

این اے 122 کی نشست پر ضمنی انتخاب الیکشن کمیشن کی جانب سے ایازصادق کے انتخاب کوکالعدم قراردینے پر ہورہے ہیں۔

عمران خان کا خطاب


تحریک انصاف کے سربراہ نے زندہ دلانِ لاہور سے خطاب کرتے ہوئے کہا کہ یہاں جنون ہے جس کا مقابلہ ایک ایسی جماعت سے ہے جس کا سورج غروب ہورہا ہے۔

انہوں نے یہ بھی کہا کہ پنجاب پولیس مسلم لیگ ن کاعسکری ونگ ہے جسے وہ سیاسی مخالفین کے خلاف استعمال کرتی ہے۔

انہوں نے این اے 122 کے امیدوارعلیم خان کو خراجِ تحسین پیش کیا کہ جنہوں نے لاہورمیں تحریک انصاف کا منشورعام کرنے میں دن رات محنت کی۔

عمران خان نے لاہور کے شہریوں سے کہاکہ وہ این اے 122 میں مسلم لیگ ن کو ہر صورت دھاندلی سے روکیں کیوں کہ حکمران جماعت دھاندلی کے بغیرنہیں جیت سکتی۔

انہوں نے وزیراعظم نواز شریف کو مخاطب کرکے کہا کہ اگر وہ واقعی شیر ہیں تو گیدڑوں کے پیچھے چھپتے کیوں ہیں اگر ہمت ہے تو سامنے آکر مقابلہ کریں۔

انہوں نے کہا کہ غدار وہ ہوتا ہےجو ملک کی دولت لوٹ کر باہر لے جائے میں نے 18 سال باہرکما کرپاکستان میں رقم لایا اور نواز شریف پاکستان کی دولت لوٹ کر باہر لے گئے۔

تحریک انصاف کے سربراہ نے کہا کہ نواز شریف نے اسامہ بن لادن سے بیسے لئے جس کااعتراف خالد خواجہ نے عدالت میں کیا۔

عمران خان نے یہ بھی کہا کہ برا وقت آنے پر جدہ نہیں جاوٗں گا، شیخ رشید گواہ ہیں کہ نواز شریف خلیجی ممالک سے پیسے لیتے رہے ہیں۔

انہوں نے دعویٰ کیا کہ پنجاب پولیس آج کرپٹ ترین ادارہ ہے ہم اقتدار میں آئیں گے تو اسی پولیس کی حالت سدھاریں گے ، اہلکاروں کی تنخواہیں بڑھائیں گے اور مناسب ٹریننگ دیں گے کہ ماڈل ٹاوٗن جیسا واقعہ دوبارہ نہ ہو۔

علیم خان کا خطاب


این اے 122 سے تحریک انصاف کے امیدوار علیم خان نے خطاب کرتے ہوئے کہا کہ ان کی جماعت مسلم لیگ ن کولاہور کی گلیوں میں لے آئی ہے۔

انہوں نے یہ بھی کہا کہ عوام جانتے ہیں کہ کس نے اسپیکر شپ کے مزے لئے اور کون عوام کے ساتھ رہا۔

شاہ محمود قریشی کا خطاب


تحریک انصاف کے نائب صدر شاہ محمود قریشی نے جلسے سے خطاب کرتے ہوئے کہا کہ این اے 122 کا الیکشن عوام کی کچہری ہے جس میں فیصلہ ہونا ہے۔

ان کا کہنا تھا کہ جیسے جیسے انتخابی مہم آگے بڑھی مسلم لیگ ن کا گراف گرتا گیا۔

شیخ رشید کا خطاب


عوامی مسلم لیگ کے سربراہ شیخ رشید نے جلسے سے خطاب کرتے ہوئے کہا کہ ایازصادق نے دو سال اسمبلی

میں میرا مائیک بند رکھا ہے۔

انہوں نے یہ بھی کہا کہ علیم خان کا مقابلہ سرکاری اداروں سے ہے 11 اکتوبرکوعوام ایازصادق کو مسترد کردیں گے۔

انہوں نے پرویز رشید سمیت مسلم لیگ ن کے رہنماوٗں کو مخاطب کرکے کہا کہ عنقریب عمران خان سب کا احتساب کرے گا۔

انہوں نے نواز شریف امریکہ جارہے ہیں لیکن ان کے پیچھے کوئی اور بھی امریکہ جارہا ہے۔

انہوں نے اہلیانِ لاہور کو مخاطب کرکے کہا کہ میں واحد سیاستدان ہوں جو کہ اپنی لاش کندھے پرڈالے گھومتا ہے۔

Comments

comments

یہ بھی پڑھیں