پشاور: پاکستان تحریک انصاف (پی ٹی آئی) کے بانی عمران خان نے وزراء کی کارکردگی کی نگرانی کے لیے کے پی کے وزیر اعلیٰ کی مشاورت سے 3 رکنی کمیٹی تشکیل دی ہے۔
تفصیلات کے مطابق کرپشن کی روک تھام کیلئے بانی پی ٹی آئی نے کمیٹی بنادی، کمیٹی میں شاہ فرمان، سینئر قانونی ماہر قاضی انور اور وزیراعلیٰ کے مشیر برائے انسداد بدعنوانی مصدق شامل ہیں۔
کمیٹی بدعنوانی سے متعلق شکایات کا جائزہ لے گی اور گڈ گورننس کے لیے اقدامات تجویز کرے گی، ساتھ ہی کمیٹی وزیراعلیٰ اور دیگر وزراء کی کارکردگی کو بھی مانیٹر کرے گا۔
پی ٹی آئی رہنما قاضی انور نے اس حوالے سے بتایا کہ کمیٹی وزیراعلیٰ سمیت وزراکارکردگی کی نگرانی کرے گی اس کمیٹی کا مقصد محکمہ اینٹی کرپشن کا دائرہ اختیار بڑھانا ہے۔
قاضی انور نے کہا کہ کمیٹی گریڈ 21 کے افسران اور وزرا کی بدعنوانی کا بھی جائزہ لے گی، کمیٹی مختلف پہلو پر جائزہ لینے کے بعد کیسز عدالتوں کو بھیجے گی۔
پی ٹی آئی رہنما قاضی انور نے مزید بتایا کہ وزیراعلیٰ اور بانی پی ٹی آئی کی ملاقات میں وزرا کی کارکردگی پر تحفظات کا اظہار کیا گیا تھا، کمیٹی وزرا کی گڈ گورننس، مالی بدعنوانی کی شکایات سے بانی پی ٹی آئی، وزیراعلیٰ کو آگاہ کریگی۔
