بانی پی ٹی آئی سے اڈیالہ جیل میں وزیراعلیٰ کےپی علی امین گنڈاپور نے ملاقات کی، انھوں نے صحافیوں سے غیررسمی بات چیت بھی کی۔
اے آر وائی نیوز کے مطابق 9 مئی جی ایچ کیو حملہ کیس کی سماعت کے دوران علی امین گنڈا پور کی بانی پی ٹی آئی سے ملاقات ہوئی، کمرہ عدالت میں بانی پی ٹی آئی، علی امین، شاہ محمود قریشی اور سلمان اکرم کے درمیان مشاورت ہوئی۔
سماعت کے بعد وزیراعلیٰ علی امین گنڈاپور نے صحافیوں سے غیررسمی بات چیت بھی کی، وزیراعلیٰ علی امین گنڈاپور نے کہا کہ سول نافرمانی کی تحریک پر بانی پی ٹی آئی سے مشاورت ہوئی ہے۔
ان کا کہنا تھا کہ جو حالات بن گئے ہیں ایسے میں سب پاکستان کیلئے سوچنے پر مجبور ہیں، امید کرتا ہوں سیاسی جماعتیں اور اسٹیبلشمنٹ غوروفکر کرکے کوئی حل نکالیں گی۔
وزیر اعلیٰ خیبر پختونخوا علی امین گنڈاپور نے اس حوالے سے مزید کہا کہ حکومت جن کی ہے وہ اشارہ دیں گے تو مثبت رسپانس بھی آجائےگا۔
انھوں نے کہا کہ میری آفیشل میٹنگز بھی ہوتی رہتی ہیں ان میں بھی بات کرتا رہتا ہوں، ہفتے تک دونوں جانب سے مثبت پیش رفت کی امید ہے۔
