اسلام آباد: حکومت نے غیر ملکی دوروں سے متعلق نئے قوانین متعارف کرانے کا فیصلہ کر لیا، متعدد وزارتوں کے غیر ضروری دوروں کو ختم کر دیا گیا۔
تفصیلات کے مطابق حکومت نے فیصلہ کر لیا ہے کہ غیر ضروری غیر ملکی دوروں کا خاتمہ کر دیا جائے، اس سلسلے میں حکومت کی جانب سے نئے قوانین متعارف کرائے جا رہے ہیں۔
[bs-quote quote=”غیر ملکی دوروں میں آئندہ 33 فی صد کے قریب کمی آئے گی: وزیرِ اطلاعات” style=”style-7″ align=”left” color=”#dd3333″][/bs-quote]
حکومتی فیصلے سے متعلق وفاقی وزیرِ اطلاعات فواد چوہدری نے بتایا کہ غیر ملکی دوروں میں آئندہ 33 فی صد کے قریب کمی آئے گی۔
وفاقی وزیرِ اطلاعات نے مزید بتایا کہ وفاقی وزرا کے دوروں میں بھی کمی کر دی گئی ہے، وزرا سال میں اب 3 بار سے زائد غیر ملکی دورے نہیں کر سکیں گے۔
واضح رہے کہ تحریکِ انصاف کی حکومت نے اخراجات کی کمی کے لیے متعدد پالیسیاں تشکیل دیں، جن میں سے ایک وزرا کے غیر ملکی دوروں میں کمی لانا بھی ہے۔
یہ بھی پڑھیں: سعودی عرب کے بعد وزیراعظم عمران خان اگلے دورے پر چین جائیں گے
پی ٹی آئی حکومت پہلے ہی کابینہ کے تمام ارکان سے ماضی کی حکومتوں میں دی گئی بیرون ملک علاج کی سہولت واپس لے چکی ہے جس کے بعد سرکاری خرچ پر کوئی رکن بیرون ملک علاج نہیں کرا سکے گا۔
20 اگست کو وفاقی کابینہ کے پہلے اجلاس میں سرکاری حکام کے غیر ملکی دوروں کو محدود کرنے کا بھی فیصلہ کیا گیا، جس کے بعد سرکاری حکام سرکاری خرچ پر بیرون ملک دورے نہیں کر سکیں گے۔
