اسلام آباد : تحریک انصاف حکومت نے شعبہ صحت میں تاریخ رقم کر دی اور ملکی تاریخ کی کامیاب ترین انسدادپولیومہم چلانےمیں کامیابی حاصل کرلی۔
تفصیلات کے مطابق قومی پولیومہم سے متعلق ڈبلیو ایچ او کی غیرجانبداررپورٹ میں انکشاف کیا گیا ہے کہ گزشتہ قومی انسداد پولیو مہم تاریخ کی کامیاب ترین مہم ثابت ہوئی۔
رپورٹ میں کہا گیا ہے ملکی تاریخ میں پہلی بار 98 فیصد بچوں کوپولیو قطرےپلائے گئے اور گزشتہ قومی پولیومہم میں 2 فیصد بچے ویکسین سے محروم رہے۔
ڈبلیو ایچ او رپورٹ کے مطابق پولیومہم کا حصہ93 فیصد بچوں کی انگلی پر تصدیقی نشان پائے گئے، پنجاب 98.1 ، سندھ 97.8 ، کے پی 98.6 ، بلوچستان 97.4 فیصد بچوں کو پولیو ویکسین پلائی گئی۔
رپورٹ میں کہا گیا فاٹا اضلاع کے 98.8 فیصد جی بی 99.2، آزاد کشمیر 97 فیصد بچوں میں پولیو ویکسی نیشن کی تصدیق ہوئی جبکہ اسلام آباد کے 95.3فیصد بچوں کو پولیو قطرے پلائے گئے۔
ذرائع کا کہنا ہے کہ قومی پولیومہم کی کارکردگی جانچنے کیلئے تھرڈ پارٹی سروے کرایا جاتا ہے۔
یاد رہے رواں ماہ کے آغاز میں وزیراعظم عمران خان نے ملک کے طول و عرض سے پولیو کے خاتمے کے لیےپانچ سالہ پلان کی منظوری دی تھی اور ہدایت کی تھی کہ ہنگامی اقدامات کیے جائیں گے۔
مزید پڑھیں: وزیراعظم نے پولیو کے خاتمے کے لیے 5 سالہ پلان کی منظوری دے دی
خیال رہے کہ وزیراعظم عمران خان نے پولیو سے بچاؤ کے عالمی دن پر اپنے پیغام میں کہا کہ بچوں کے لیے پولیو سے پاک، محفوظ اور صحت مند پاکستان بنائیں گے، پاکستان تحریک انصاف کی حکومت پاکستان سے پولیو کے خاتمے کے لیے پُرعزم ہے۔
واضح رہے کہ گزشتہ 2 سال میں پاکستان نے انسداد پولیو کے لیے نہایت بہترین اور منظم اقدامات اٹھائے ہیں جن کے باعث ان 2 سالوں میں پولیو کیسز کی شرح میں خاصی کمی آئی ہے۔
