کراچی : پی ٹی آئی سندھ کے صدر علی زیدی کو ملیر کورٹ میں پیش کیا گیا، پولیس نے جسمانی ریمانڈ کی استدعا کی تھی جس کے بعد انہیں 3 روزہ ریمانڈ پر پولیس کے حوالے کردیا گیا۔
تفصیلات کے مطابق پاکستان تحریک انصاف کے مرکزی صوبائی رہنما علی زیدی کو بکتر بند گاڑی میں ملیر کی عدالت میں لایا گیا، اس موقع پر سیکیورٹی کے سخت ترین انتظامات کیے گئے تھے۔
ملیر کورٹ کے باہر پی ٹی آئی کارکنان کی تعداد موجود تھی انہوں نے علی زیدی کا پرتپاک استقبال کیا اور، پھولوں کی پتیاں نچھاورکیں، اس موقع پر پی ٹی آئی رہنماؤں اور کارکنوں نے شدید نعرے بازی کی، عمران اسماعیل، مبین جتوئی، آفتاب صدیقی، خرم شیرزمان، بلال غفار ودیگر موجود تھے۔
یاد رہے کہ پاکستان تحریک انصاف سندھ کے صدر علی زیدی کو کراچی کے علاقے ڈیفنس میں قائم پی ٹی آئی دفتر سے گرفتار کیا گیا تھا، انہیں ایک سال پرانے فراڈ کے مقدمے میں گرفتار کیا گیا۔
علی زیدی کو پولیس کی بھاری نفری کے درمیان ملیر کورٹ پہنچایا گیا، کمرہ عدالت میں شدید بدنظمی اور شور شرابے کے باعث جج اٹھ کر چیمبر میں واپس چلے گئے، جوڈیشل مجسٹریٹ نے کہا کہ کمرہ عدالت خالی کریں پھر کارروائی ہوگی، پی ٹی آئی رہنماؤں اور کارکنوں کو عدالت سے باہر نکلنے کی ہدایت کی گئی۔
مختصر وقفے کے بعد جوڈیشل مجسٹریٹ ملیر نے مقدمے کی سماعت دوبارہ شروع کردی، علی زیدی روسٹرم پر آگئے، پی ٹی آئی رہنماء کو ہٹھکڑیاں لگا کر پیش کیا گیا۔
پولیس نے پی ٹی آئی رہنماء کا جسمانی ریمانڈ مانگ لیا۔ تفتیشی افسر کا کہنا ہے کہ تحقیقات کرنی ہے سات یوم کا جسمانی ریمانڈ دیا جائے۔
علی زیدی نے عدالت روبرو بیان میں کہا کہ میری گرفتاری افطاری سے کچھ دیر پہلے ہوئی لیکن پرچہ رات 12بجے درج کیا گیا۔
