قومی اسمبلی اسپیکر: تحریک انصاف نے خورشید شاہ سے اسد قیصر کے حق میں دست برداری کی درخواست کردی -
The news is by your side.

Advertisement

قومی اسمبلی اسپیکر: تحریک انصاف نے خورشید شاہ سے اسد قیصر کے حق میں دست برداری کی درخواست کردی

قومی ایجنڈے کو سامنے رکھ کر چیلنجز کا مقابلہ کریں گے، قوم کو نیا پاکستان دیں گے، اسد قیصر

اسلام آباد: پاکستان تحریکِ انصاف نے قومی اسمبلی کے اسپیکر کے لیے پیپلز پارٹی کے امیدوار خورشید شاہ سے اسد قیصر کے حق میں دست بردار ہونے کی درخواست کر دی۔

تفصیلات کے مطابق پی ٹی آئی اور پیپلز پارٹی کے وفود کے درمیان ہونے والے مذاکرات میں تحریکِ انصاف نے خورشید شاہ سے درخواست کی کہ وہ پی ٹی آئی کے اسد قیصر کے حق میں دست بردار ہوجائیں۔

پی ٹی آئی کے ترجمان فواد چوہدری نے ملاقات کے بعد میڈیا سے گفتگو کرتے ہوئے کہا ’خورشید شاہ سے اسد قیصر کے حق میں دستبرداری کی درخواست کی ہے، پیپلز پارٹی سے کہا کہ وہ ہمیں ووٹ دے۔‘

فواد چوہدری نے کہا کہ ملاقاتوں کا مقصد پارلیمانی جماعتوں کا تعاون حاصل کرنا تھا، ہم نے پارلیمان کو مضبوط بنانا ہے، سب کو متحد ہو کر چیلنجز کا مقابلہ کرنا ہے۔

پی ٹی آئی ترجمان کا کہنا تھا کہ دنیا کے مختلف ممالک سے فون آ رہے ہیں، دنیا عمران خان کو عالمی لیڈر کی طرح دیکھ رہی ہے، سعودی ولی عہد شاہ سلمان نے بھی عمران خان کے لیے نیک تمناؤں کا اظہار کیا۔

نئے پاکستان میں نئی بات ہونی چاہیے، اسپیکر سینئر ترین پارلیمنٹیرین ہو، خورشید شاہ

فواد چوہدری نے مزید کہا کہ ہم نے ایم کیو ایم، بی این پی مینگل اور پی پی کے رہنماؤں کو تقریبِ حلف برداری میں شرکت کے لیے دعوت نامے دیے ہیں، عمران خان سوال جواب کے لیے خود پارلیمنٹ آئیں گے۔

دریں اثنا پی ٹی آئی کی جانب سے اسپیکر قومی اسمبلی کے منصب کے لیے نامزد امیدوار اسد قیصر نے بھی میڈیا سے گفتگو کی، انھوں نے کہا کہ آج ایم کیو ایم سمیت پارلیمانی رہنماؤں سے ملاقاتیں کی گئیں، چاہتے ہیں کہ پارلیمنٹ میں سیاسی جماعتیں عوامی توقعات پر پورا اتریں۔

نامزد اسپیکر قومی اسمبلی نے کہا کہ ملک کو سنجیدہ چیلنجز کا سامنا ہے، قومی ایجنڈے کو سامنے رکھ کر چیلنجز کا مقابلہ کریں گے اور قوم کو ایک نیا پاکستان بنا کردیں گے۔

Comments

comments

یہ بھی پڑھیں