پاکستان تحریک انصاف کے رہنما فیاض الحسن چوہان نے کہا ہے کہ کرائم منسٹر نیب کے ملزم فواد حسن فواد کو ہی چیئرمین نیب بنانے کا سوچ رہے ہیں۔
پی ٹی آئی رہنما اور سابق صوبائی وزیر فیاض الحسن چوہان نے سماجی رابطوں کی ویب سائٹ ٹوئٹر پر ٹوئٹ کرتے ہوئے حکومت پر شدید تنقید کی ہے۔
فیاض الحسن چوہان نے اپنے ٹوئٹ میں کہا ہے کہ مشتری ہوشیار باش، باادب باملاحظہ، ہوشیار کرائم منسٹر کٹھ پتلی اپوزیشن لیڈر راجا ریاض سے مشورہ کر رہے ہیں۔
فیاض چوہان نے مزید لکھا کہ نیب ملزم فواد حسن فواد کو چیئرمین نیب بنانے کا بھی سوچ رہے ہیں۔
پنجاب کے سابق صوبائی وزیر نے اپنے ٹوئٹ کا اختتام اس دلچسپ جملے کے ساتھ کیا ہے کہ "اعلان ختم، پاکستان کا خزانہ ہضم”
مشتری ہوشیار باش۔۔۔!!!
با ادب با ملاحظہ ۔۔۔۔کرائم منسٹر مقصود چپراسی اپنے ہاتھوں سے بنائے ہوئے کٹھ پتلی اپوزیشن لیڈر راجہ ریاض کے مشورے سے نیب ملزم فواد حسن فواد کو نیب کا چئیرمین بنانے کا سوچ رہے ہیں
اعلان ختم۔۔پاکستان کا خزانہ ہضم#امپورٹڈ_حکومت_نامنظور— Fayaz ul Hassan Chohan (@Fayazchohanpti) May 27, 2022
واضح رہے کہ حکومت نے ریٹائرڈ جج کے بجائے ریٹائرڈ بیورو کریٹ کوچیئرمین نیب لگانے کا فیصلہ کیا ہے اور ابتدائی طور پر فواد حسن فواد، نیب قمر الزماں اور بشیر میمن کے نام پر غور کیا جارہا ہے۔
یہ بھی پڑھیں: حکومت کا ریٹائرڈ جج کے بجائے ریٹائرڈ بیورو کریٹ کو چیئرمین نیب لگانے کا فیصلہ
وزیراعظم شہباز شریف نے چیئرمین قومی احتساب بیورو کی تعیناتی کے معاملے پر مشاورت شروع کردی ہے اور ذرائع کا کہنا ہے کہ اس سلسلے میں وزیراعظم شہباز شریف سے اپوزیشن لیڈرراجا ریاض کی ملاقات ہوئی جس میں دونوں رہنماؤں نے چیئرمین نیب کےلیے مختلف ناموں پر غور کیا اور ابتدائی طور پر مذکورہ تین ناموں پر مشاورت کی گئی ہے۔