The news is by your side.

Advertisement

پی ٹی آئی وفاق کے بعد پنجاب میں بھی حکومت بنانے کی پوزیشن میں آگئی

اسلام آباد: الیکشن 2018 میں سب سے زیادہ سیٹیں لینے والی پاکستان تحریکِ انصاف وفاق کے بعد پنجاب میں بھی حکومت بنانے کی پوزیشن میں آگئی۔

تفصیلات کے بعد پی ٹی آئی نے نیا پنجاب بنانے کا بھی فیصلہ کر لیا ہے، سب سے بڑے صوبے میں حکومت سازی کے لیے تحریک انصاف نے نمبر گیم پورا کرلیا۔

وفاق میں حکومت: ایم کیو ایم اور آزاد ارکان کی اہمیت


دریں اثنا وفاق میں حکومت سازی کے لیے بنی گالہ میں اجلاس ہوا جس میں پی ٹی آئی کے اہم رہنماؤں نے شرکت کی، سید فخر امام سمیت کئی آزاد ارکان نے کپتان کے ساتھ بیٹھک کی۔

مخصوص اور اتحادی سیٹوں کو ملا کر اب تک تحریکِ انصاف کو 162 ارکان کی حمایت مل چکی ہے، جب کہ پارٹی کو حکومت بنانے کے لیے 172 ارکان درکار ہیں، اس پسِ منظر میں ایم کیو ایم کے 6 اور 13 آزاد ارکان کا کردار اہم ہو گیا ہے، اس سلسلے میں جہانگیر ترین اور خالد مقبول کی ملاقات جلد متوقع ہے۔

انتخابات 2018: کس پارٹی نے کتنے ووٹ حاصل کیے


یوم آزادی کا جشن نئے پاکستان کے نئے وزیر اعظم کے ساتھ منایا جائے گا، پی ٹی آئی رہنما نعیم الحق کہتے ہیں عمران خان چودہ اگست سے پہلے وزارت عظمیٰ کا حلف اٹھالیں گے۔

پی ٹی آئی پنجاب میں بھی حکومت سازی کی پوزیشن میں


پنجاب میں حکومت سازی کے لیے آزاد امیدواروں کی اہمیت بڑھ گئی ہے، ڈیرہ غازی خان اور لیہ کے چار ارکان پی ٹی آئی میں شامل ہوگئے ہیں، جہانگیر ترین نے شاہ محمود قریشی کو ہرانے والے امیدوار سلمان نعیم کو کھلاڑی بننے کی دعوت دے دی۔

پی ٹی آئی کی 123 سیٹیں سات آزاد ارکان کی شمولیت کے بعد ایک سو تیس ہوگئی ہیں، نعیم الحق کہتے ہیں مزید آزاد ارکان سے بھی رابطے ہیں، کل تک اعلان ہوجائے گا۔

پنجاب میں پی ٹی آئی کے وزیرِ اعلیٰ کے لیے کوئی فیصلہ سامنے نہیں آیا ہے، اس سلسلے میں شاہ محمود قریشی، فواد، علیم خان یا یاسمین راشد کا نام لیا جا رہا ہے، تاہم یاسمین راشد کا کہنا ہے کہ بنی گالہ میں عہدے نہیں بانٹے جا رہے، فیصلہ سوچ سمجھ کر ہوگا۔

پنجاب میں آزاد امیدواروں کو کھلاڑی بنانے کا مشن


دوسری طرف پنجاب میں حکومت سازی کے لیے آزاد امیدواروں کو کھلاڑی بنانے کا مشن عروج پر ہے، جہانگیر ترین کے بعد چوہدری سرور نے بھی فیصل آباد، چنیوٹ اور جھنگ کا دورہ کر لیا ہے۔

چوہدری سرور نے فیصل آباد سے آزاد ایم پی اے اجمل چیمہ سے ملاقات کی، جھنگ سے آزاد ایم پی ایز مہر اسلم بھر وانہ اور محمد معاویہ اعظم سے بھی ملاقات کی گئی۔

پی ٹی آئی رہنما نے جھنگ سے آزاد ایم پی اے رائے تیمور بھٹی کو پی ٹی آئی میں شمولیت کی دعوت دے دی ہے، چینوٹ سے آزاد ایم پی اے ملک تیمور لالی کو بھی کپتان کا پیغام پہنچا دیا گیا ہے۔

واضح رہے کہ تحریکِ انصاف نے پنجاب میں بھی حکومت بنانے کا فیصلہ کر لیا ہے، اس سلسلے میں آزاد امیدواروں نے پی ٹی آئی کوحمایت کی یقین دہانی کرا دی ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں