لاہور : پاکستان تحریک انصاف کے چیئرمین عمران خان نے رہنماؤں کو ہدایات دی ہیں کہ موجودہ حکومت کو جو این آر او ٹو دیا گیا اور اس نے جس طرح معیشت کو تباہ کیا اسے عوام کے سامنے لایا جائے۔
یہ ہدایات انہوں نے لاہور میں پی ٹی آئی میڈیا اسٹریٹجک کمیٹی کے ہونے والے اجلاس کی صدارت کرتے ہوئے دیں، اجلاس میں فواد چوہدری، فرخ حبیب ، اسدعمر، مسرت جمشید سمیت دیگر رہنما شریک تھے۔
عمران خان کا کہنا تھا کہ اس اہم اجلاس میں پی ڈی ایم حکومت کی کرپشن کو اجاگر کرنے کا فیصلہ کیا گیا اپنے خطاب میں عمران خان نے کہا کہ جلد انتخابات کیلئے سوشل میڈیا کےذریعے رائے عامہ کو ہموار کیا جائے۔
پی ٹی آئی چیئرمین کا کہنا تھا کہ سلیمان شہباز کی وطن واپسی پر اس کے خلاف قائم کرپشن کے مقدمات کو اجاگر کیا جائے، این آر او ٹو نے جس طرح ملکی معیشت کو تباہ کیا اسے عوام کے سامنے لایا جائے۔
عمران خان نے کہا کہ پی ڈی ایم حکومت کی غیر ذمہ دارانہ پالیسیاں سوشل میڈیا پر عوام کے سامنے لائی جائیں، پاکستان پی ڈی ایم حکومت کی وجہ سے معاشی گرداب میں بری طرح پھنس چکا ہے۔
اجلاس سے خطاب کرتے ہوئے حریک انصاف کے چیئرمین عمران خان نے مزید کہا کہ پاکستان کو اقتصادی بھنور سے نکالنے کا واحد طریقہ فوری اور شفاف انتخابات ہیں۔
