The news is by your side.

پی ٹی آئی نے ایم کیو ایم کی شکایات کے ازالے کیلئے قائم کمیٹی مسترد کردی

اسلام آباد : پاکستان تحریک انصاف نے ایم کیو ایم کی شکایات کے ازالے کے لئے قائم کی گئی حکومتی کمیٹی مسترد کردی۔

تفصیلات کے مطابق پی ٹی آئی نے متحدہ قومی موومنٹ کی شکایات کے ازالے کے لئے قائم حکومتی کمیٹی کو مسترد کرتے ہوئے کہا ہے کہ کمیٹی کا قیام ملک کے عدالتی نظام پر عدم اعتماد کا واضح اظہار ہے۔

ترجمان پی ٹی آئی نعیم الحق نے ایم کیو ایم کی شکایات کے ازالے سے متعلق قائم کمیٹی پر اظہار تشویش کرتے ہوئے کہا کہ کمیٹی کے قیام سے کراچی میں جاری آپریشن بری طرح متاثر ہونے کا خدشہ پیدا ہو گیا ہے ۔

انہوں نے کہا کہ کمیٹی کا قیام نہ صرف ملک کے عدالتی نظام پرعدم اعتماد کا واضح اظہار ہے بلکہ کمیٹی میں متحدہ کے رکن کی موجودگی سے سیاسی بلیک میلنگ کا بھی خطرہ ہے۔

نعیم الحق نے مزید کہا کہ سیکرٹری داخلہ کو کمیٹی کا سیکرٹری مقرر کر کے متحدہ کو آپریشن کے خفیہ پہلوؤں تک رسائی دینے کی کوشش کی گئی ہے،لہٰذا حکومت اس کمیٹی کے ذریعے کراچی آپریشن پر اثر انداز ہونے سے گریز کرے۔

واضح رہے کہ گزشتہ روز ایم کیو ایم کے رہنما ڈاکٹرفاروق ستاراور وزیر خزانہ اسحاق ڈار نے کمیٹی کے قیام کے حوالے سے مفاہمتی یاد داشت پر دستخط کئے تھے۔

کمیٹی میں سیکریٹری کے فرائض وفاقی سیکریٹری داخلہ انجام دیں گے جب کہ دیگر ارکان میں جسٹس( ر) ناصر اسلم زاہد،جسٹس(ر)خلیل الرحمان، جسٹس(ر)اجمل میاں اور فروغ نسیم ایڈووکیٹ شامل ہیں۔

Print Friendly, PDF & Email

Comments

comments

یہ بھی پڑھیں