دادو: پاکستان تحریک انصاف کے نو منتخب کونسلر نیاز علی برڑو کو گرفتار کر لیا گیا۔
تفصیلات کے مطابق میہڑ میں پولیس نے چھاپا مار کر پی ٹی آئی کے نو منتخب کونسلر نیاز برڑو کو حراست میں لے لیا ہے، پولیس حکام کا کہنا ہے کہ ممکنہ تصادم کے خدشے پر نیاز برڑو کو حراست میں لیا گیا ہے۔
نیاز برڑو کی گرفتاری کے خلاف شہر میں ہڑتال کر دی گئی، اور پی ٹی آئی کارکنوں نے انڈس ہائی وے پر دھرنا دے دیا ہے۔
واضح رہے کہ میہڑ میونسپل کمیٹی وارڈ نمبر 1 میں ری کاؤنٹنگ کی درخواست دائر ہے، پی ٹی آئی کونسلر نے نتائج کی تبدیلی کی صورت میں شدید احتجاج کی کال دے رکھی ہے۔
ادھر لیاقت جتوئی نے نیاز برڑو کی گرفتاری پر رد عمل میں کہا ہے کہ سندھ حکومت سے دادو میں پی ٹی آئی کی جیت ہضم نہیں ہو رہی، میہڑ میں جیتنے والے کونسلر کی سیاسی وفاداری تبدیل کرانے کی کوشش ہو رہی ہے۔
لیاقت جتوئی نے کہا سندھ حکومت جیتنے والے کونسلر کے خلاف انتقامی کارروائی بند کرے، گرفتار کونسلر کو رہا نہ کیا گیا تو پورے ضلع میں احتجاج کریں گے۔
