تحریک انصاف کے نومنتخب رکن اسمبلی ندیم عباس کو عدالت نے جیل بھیج دیا
The news is by your side.

Advertisement

تحریک انصاف کے نومنتخب رکن اسمبلی ندیم عباس کو عدالت نے جوڈیشل ریمانڈ پر جیل بھیج دیا

لاہور: انسداددہشت گردی کی عدالت نے تحریک انصاف نومنتخب رکن اسمبلی ندیم عباس بارا اور دیگر گرفتار ملزمان کو چودہ روزہ جوڈیشل ریمانڈ پر جیل بھیج دیا۔

تفصیلات کے مطابق پولیس اہلکاروں پر مبینہ تشدد اور ہوائی فائرنگ کےکیس میں از خود گرفتاری دینے والے تحریک انصاف کے پی پی 161 سے منتخب ہونے والے رکن پنجاب اسمبلی و دیگر ملزمان کو تین روز کا جسمانی ریمانڈ مکمل ہونے پر انسداد دہشت گردی کی عدالت میں پیش کیا گیا۔

پولیس کی جانب سے عدالت میں فرانزک رپورٹ پیش کی گئی جس کے مطابق ملزمان کے پاس سے کوئی اسلحہ، ڈنڈا اور دیگر سامان برآمد نہیں ہوا۔ ملزمان کے وکلاء کی جانب سے عدالت میں دلائل دیے گئے جس کے بعد معزز جج نے پولیس کی استدعا منظور کرتے ہوئے ندیم عباس سمیت دیگر گرفتار افراد کو  14 روزہ جوڈیشل ریمانڈ پر جیل بیھجا۔

مزید پڑھیں: پولیس پر مبینہ تشدد، پی ٹی آئی رکن اسمبلی نے ازخود گرفتاری دے دی

عدالت میں پیشی کے وقت تحریک انصاف کے کارکنان کی بڑی تعداد موجود تھی جنہوں نے ہاتھوں میں پلے کارڈ اٹھا رکھے تھے جن پر  نومنتخب رکن اسمبلی کی گرفتاری کے خلاف نعرے درج تھے۔

واضح رہے کہ 28 جولائی کو  اطلاعات سامنے آئی تھیں کہ تحریک انصاف کے نو منتخب رکن اسمبلی اپنے حلقے میں جیت کا جشن منارہے تھے کہ وہاں پہنچ کر ایس ایچ و ہنجروال نے پی ٹی آئی رہنما اور کارکنان کو آتش بازی کرنے سے روکا۔ انہوں نے جیسے ہی شرکاء کو روکنے کی کوشش کی تو اسی دوران نامعلوم افراد نے اُن پر حملہ کردیا تھا جس کے نتیجے میں ایس ایچ او اور پولیس کو شدید تشدد کا نشانہ بنایا اور اُن کی وردیاں بھی پھاڑ دی گئیں تھیں۔

یہ بھی پڑھیں: تحریک انصاف کے نومنتخب رکن اسمبلی انتقال کرگئے

چیف جسٹس آف پاکستان جسٹس میاں ثاقب نثار نے پولیس افسر پر ہونے والے تشدد کا نوٹس لے کر آئی جی پنجاب کو ہر صورت ملزم کی گرفتاری کا حکم جاری کیا تھا۔

بعد ازاں تحریک انصاف کے نومنتخب رکن پنجاب اسمبلی پر الزام عائد کیا گیا تھا کہ پولیس پر تشدد اُن کی ہدایت پر کیا گیا البتہ ندیم عباس نے اپنے اوپر عائد ہونے والے الزامات کو مسترد کرتے ہوئے خود کو قانون کے سامنے پیش کیا اور ازخود گرفتاری دی۔

Comments

comments

یہ بھی پڑھیں