اسلام آباد : پی ٹی آئی نے رہنماؤں اور کارکنوں کی گرفتاری کا معاملہ سینیٹ میں اٹھادیا، اپوزیشن لیڈر شہزاد وسیم نے حکومت پر کڑی تنقید کرتے ہوئے کہا جو ہو رہا وہ درست نہیں۔
تفصیلات کے مطابق چیئرمین صادق سنجرانی کی زیرصدارت سینیٹ کا اجلاس ہوا، جس میں اپوزیشن لیڈر شہزاد وسیم نے پی ٹی آئی کے خلاف کریک ڈاؤن اور گرفتاریوں کا معاملہ اٹھا دیا۔
شہزاد وسیم نے اظہار خیال کرتے ہوئے کہا خواتین پرتشددکیاجارہاہے، اراکین پارلیمنٹ پربھی کریک ڈاؤن جاری ہے، ارکان پارلیمنٹ کوگرفتارنہیں کیاجاسکتا، اراکین کی گرفتاریوں کیلئے چیئرمین سینیٹ اور اسپیکرکی اجازت ضروری ہے۔
اپوزیشن لیڈر نے کہا کہ کل پی ٹی آئی کے خلاف ملک بھر میں کریک ڈاؤن کیا گیا، وقت ایک سا نہیں رہتا مگرجو ہو رہا وہ درست نہیں ، ولید اقبال کے گھر علامہ اقبال کی بہو رات کو سراپااحتجاج تھی، کارکنوں کے گھر میں گھس کر خواتین کو ہراساں کیا گیا۔
ان کا کہنا تھا کہ شیریں مزاری کیس میں کورٹ کا آرڈرموجود ہے، ایوان کے ارکان کی حفاظت اس ایوان کی ذمہ داری ہے.
شہزاد وسیم نے مزید کہا کہ جو ہو رہا وہ درست نہیں >ہمارا لانگ مارچ پر امن ہے ایک پتہ تک نہیں ٹوٹے گا، جب انہوں نے احتجاج کئے ہم نے انہیں مکمل آزادی دی، یہ معاملہ ریاست کا ہے کسی ایک پارٹی کا نہیں۔
