اسلام آباد : پاکستان تحریک انصاف نے عام انتخابات 2018کیلئے اپنے امیدوار میدان میں اتار دیئے، عمران خان این اے 35 بنوں، این اے 53 اسلام آباد، این اے 95 میانوالی اور این اے 243 کراچی سے الیکشن لڑیں گے۔
تفصیلات کے مطابق پاکستان تحریک انصاف نے امیدواروں کے انتخاب کا طویل مرحلہ مکمل کرلیا اور عام انتخابات2018 کیلئے امیدواروں کی حتمی فہرست جاری کردی، امیدواروں کی حتمی فہرست عمران خان کی منظوری سے جاری کی گئی۔
پی ٹی آئی نے قومی اسمبلی کی 272 میں سے 229 حلقوں کیلئے امیدوارنامزد کئے ہیں، جن میں پختونخوا کے 99 میں سے 90 حلقوں میں امیدوار، پنجاب کے 238 حلقوں کیلئے امیدوار، سندھ کے 79،بلوچستان کے36 حلقوں کیلئے امیدوار کھڑے کردیے گئے ہیں۔
اسلام آباد کی تینوں نشستوں کے لئے امیدواروں کا اعلان کردیا گیا جبکہ فاٹا کے 11 حلقوں میں امیدواروں کو بھی نامز کردیا گیا ہے، باقی بچ جانے والے حلقوں کیلئے امیدواروں کا اعلان چند روز میں کیا جائے گا۔
حتمی فہرست کے مطابق عمران خان قومی اسمبلی کے 4حلقوں سے انتخابات میں حصہ لے رہے ہیں، جن میں این اے35بنوں،این اے53اسلام آباد، این اے 95 میانوالی اور این اے 243 کراچی شامل ہیں۔
شاہ محمود قریشی قومی اسمبلی کی 3نشستوں پر انتخابی دنگل میں اترے ہیں، وہ این اے 156ملتان، این اے220عمر کوٹ اوراین اے221 تھرپارکر سے انتخابات میں حصہ لیں گے۔
مراد سعید این اے 4 سوات، پرویز خٹک این اے 25 نوشہرہ سے میدان میں ہیں جبکہ اسد عمر این اے 54 اسلام آباد، فوادچوہدری این اے 67 جہلم سے امیدوار ہیں۔
سیالکوٹ کے حلقوں این اے 72 سے فردوس عاشق اعوان، این اے 73 سے عثمان ڈار امیدوار اور ابرار الحق این اے 78 نارووال سے انتخابات میں حصہ لے رہے ہیں۔
لاہور کے حلقوں این اے 125 سے ڈاکٹر یاسمین راشد، این اے 129 سے عبد العلیم خان امیدوار ہیں جبکہ این اے 130 لاہور سے شفقت محمود ، ملک غلام مصطفیٰ کھر این اے 181 مظفر گڑھ سے کھڑے ہیں۔
این اے 163 ویہاڑی سے پی ٹی آئی نے عائشہ نذیر کی جگہ خالد مقبول چوہان کو ٹکٹ دے دیا ہے جبکہ عمران خان کے حمایتی علی محمد خان کا نام حتمی فہرست میں شامل کرلیا گیا ہے، پہلی فہرست میں ان کا نام شامل نہیں تھا۔
سابق وفاقی وزیر اور ن لیگ کے رہنما سکندر بوسن جن کا نام حتمی فہرست سے نکال دیا گیا ہے۔
کراچی کے حلقوں این اے 244 سے علی زیدی،این اے 247 سے عارف علوی میدان میں ہیں جبکہ فیصل واوڈا این اے 249 کراچی سے انتخابات میں حصہ لے رہے ہیں۔
