اسلام آباد: پاکستان تحریک انصاف نے وزیر اعظم شاہد خاقان عباسی کو خط لکھ کر وفاقی وزیر خزانہ اسحٰق ڈار کو فوری طور پر ان کے عہدے سے ہٹانے کا مطالبہ کیا ہے۔
تفصیلات کے مطابق پاکستان تحریک انصاف نے وزیر اعظم شاہد خاقان عباسی کو خط لکھ کر وزیر خزانہ اسحٰق ڈار کو فوری طور پر معزول کرنے کا مطالبہ کیا ہے۔
خط میں کہا گیا ہے کہ احتساب عدالت کی جانب سے فرد جرم عائد ہونے کے بعد اسحٰق ڈار کا منصب سے چمٹے رہنا شرمناک ہے۔ سنگین جرائم میں ملوث وزیر خزانہ پاکستان کے لیے باعث شرمندگی ہیں۔
مزید پڑھیں: وزیر خزانہ اسحٰق ڈار پر فرد جرم عائد
تحریک انصاف کا کہنا تھا کہ اسحٰق ڈار کو تحفظ دیا تو عدالت عظمیٰ سے فوری نوٹس لینے کی درخواست کریں گے۔ قومی خزانے کی نگہبانی مجرم کے سپرد نہیں کی جاسکتی۔
اپنے خط میں تحریک انصاف کا مزید کہنا تھا کہ قومی خزانے کے تحفظ میں ناکامی پر وزیر اعظم کا بھی محاسبہ کریں گے۔
یاد رہے کہ چند روز قبل احتساب عدالت میں وزیر خزانہ اسحٰق ڈار پر آمدنی سے زائد اثاثے بنانے کے الزام میں فرد جرم عائد کردی گئی ہے لیکن اسحٰق ڈار تاحال وزارت کے منصب پر براجمان ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
