The news is by your side.

Advertisement

وزیر اعظم کی لندن آمد، پی ٹی آئی کا ایون فیلڈ کے باہر مظاہرہ

لندن: وزیر اعظم شہباز شریف کی لندن آمد پر پاکستان تحریک انصاف لندن کے کارکنوں نے ایون فیلڈ کے باہر احتجاجی مظاہرہ کیا ہے۔

اے آر وائی نیوز کے مطابق پی ٹی آئی کی جانب سے مظاہرے کے باعث مسلم لیگ (ن) کے رہنماؤں نے اجلاس سابق وزیر خزانہ اسحاق ڈار کے گھر منعقد کیا۔

اجلاس میں سابق وزیر اعظم نواز شریف اور ان کے بھائی وزیر اعظم شہباز شریف سمیت وزیر دفاع خواجہ آصف، وزیر ریلوے اور ہوا بازی سعد رفیق، ایاز صادق، وزیر اطلاعات مریم اورنگزیب نے شرکت کی۔

مسلم لیگ (ن) کے رہنماؤں کی جانب سے اس ملاقات کو خفیہ رکھا گیا۔

خیال رہے کہ گزشتہ روز پاکستان تحریک انصاف نے لندن میں وزیر اعظم شہباز شریف کی آمد پر ان کی حکومت کے خلاف احتجاجی مظاہرے کرنے کا اعلان کیا تھا۔

رہنما پی ٹی آئی میاں وحید کا کہنا تھا کہ وزیر اعظم شہباز شریف کی آمد پر نواز شریف کے بیٹے حسن نواز کے دفتر کے سامنے مظاہرہ کریں گے، مظاہرہ دن 4 بجے کیا جائے گا۔

دوسری جانب مسلم لیگ (ن) کے اندر سے قبل ازوقت انتخابات کے لیے آوازیں اٹھنے لگی ہیں۔ ذرائع کے مطابق وزیر اعظم نواز شریف لندن میں پارٹی رہنماؤں سے الیکشن کے لیے بڑھتے دباؤ پر مشاورت کریں گے۔

ذرائع کا کہنا ہے کہ بعض پارٹی رہنماؤں نے نواز شریف کو فوری انتخابات میں جانے کا مشورہ دے دیا جب کہ الیکشن اصلاحات میں تاخیر پر بھی بعض رہنماؤں نے تحفظات کا اظہار کیا ہے۔

Comments

یہ بھی پڑھیں