اسلام آباد : پاکستان تحریک انصاف نے صدارتی ریفرنس پر جواب میں کہا ہے کہ تحریک عدم اعتماد پر ووٹ کی انفرادی حیثیت نہیں ہوتی۔
تفصیلات کے مطابق پاکستان تحریک انصاف نے صدارتی ریفرنس پر جواب سپریم کورٹ میں جمع کرادیا ، جس میں کہا ہے کہ ووٹ پارٹی کی امانت ہے، تحریک عدم اعتماد پر ووٹ کی انفرادی حیثیت نہیں ہوتی۔
تحریک انصاف نے جواب میں تاحیات نااہلی پرکوئی رائے نہیں دی اور کہا تاحیات نااہلی پرعدالت جو بھی رائے دے اس پر مطمئن ہوں گے تاہم الیکشن کمیشن عدالتی رائے کے نتیجےمیں عملدرآمد کا پابند ہوگا۔
خیال رہے سپریم کورٹ بار ، مسلم لیگ ن ، پیپلز پارٹی اور جے یو آئی صدارتی ریفرنس پر جواب جمع کرا چکی ہے۔
سپریم کورٹ بار نے تحریک عدم اعتماد میں ووٹ کے حق کو انفرادی قرار دے دیا اور کہا آرٹیکل63 کے تحت کسی ایم این اے کو ووٹ سے پہلے نہیں روکا جاسکتا۔
(ن) لیگ نے صدارتی ریفرنس کو عدالت کے قیمتی وقت کا ضیاع قرار دیتے ہوئے موقف اپنایا کہ آئین کا آرٹیکل 63 اے اور 95 واضح ہے، آئین کے تحت ہر رکن کو ووٹ ڈالنے کا حق ہے کیونکہ ہر رکن اسمبلی کا کاسٹ کیا گیا ووٹ گنتی میں شمار بھی ہوگا۔
جمعیت علماء اسلام (جے یو آئی) نے آرٹیکل 63 اے غیر جمہوری قرار دے دیا اور کہا اسپیکر کو اراکین کے ووٹ مسترد کرنے کا اختیار نہیں دیا جاسکتا، سپریم کورٹ نے رائے دی تو الیکشن کمیشن فورم غیر مؤثرہوجائے گا۔
