اسلام آباد: پاکستان تحریک انصاف کے ارکان قومی اسمبلی کے استعفوں کی تصدیق کے سلسلے میں پی ٹی آئی ارکان کا کل قومی اسمبلی جانے کا پلان ملتوی کر دیا گیا۔
تفصیلات کے مطابق استعفوں کی تصدیق کے لیے پی ٹی آئی ارکان کا قومی اسمبلی جانے کا منصوبہ ملتوی ہو گیا ہے، ذرائع کا کہنا ہے کہ یہ فیصلہ اسپیکر قومی اسمبلی کی عدم دستیابی کے باعث کیا گیا۔
ارکان کل اسلام آباد میں واقع خیبر پختون خوا ہاؤس میں بھی جمع نہیں ہوں گے، جہاں کل عمران خان کو ارکان سے خطاب کرنا تھا۔
ادھر اسپیکر قومی اسمبلی راجہ پرویز اشرف سے پاکستان تحریک انصاف کے رہنماؤں کا رابطہ ہوا ہے، قومی اسمبلی میں پی ٹی آئی کے سابق چیف وہپ ملک عامر ڈوگر نے راجہ پرویز کو فون کر کے ملاقات کی استدعا کی ہے۔
عمران خان نے سندھ قیادت کو عام انتخابات میں تگڑے امیدوار چننے کی ہدایت کر دی
ملک عامر ڈوگر نے فون پر کہا کہ پی ٹی آئی فیصلے کے مطابق ان کا ایک نمائندہ وفد اسپیکر قومی اسمبلی سے ملاقات کرنا چاہتا ہے۔ اسپیکر قومی اسمبلی نے پی ٹی آئی کی جانب سے رابطہ کرنے کا خیر مقدم کیا۔
اسپیکر نے کہا کہ سیاست میں دروازے بند نہیں کیے جاتے اور سیاست دانوں میں رابطے ہونے چاہئیں۔
راجہ پرویز اشرف نے کہا کہ استعفوں کی تصدیق کے معاملے میں قومی اسمبلی کے ضوابط میں طریقہ کار موجود ہے، پی ٹی آئی کے تمام ممبران کو استعفوں کی تصدیق کے حوالے سے خطوط بھی ارسال کر دیے گئے ہیں۔
انھوں نے کہا استعفوں کے حوالے سے فیصلہ آئین اور قومی اسمبلی کے قواعد و ضوابط کے مطابق کیا جائے گا۔
