حیدر آباد : سوشل میڈیا پر ریاستی اداروں کے خلاف پوسٹ کرنے پر پی ٹی آئی یوسی چیئرمین کو گرفتار کرلیا گیا ، یوسی چیئرمین کے خلاف سائبرکرائم کا مقدمہ درج ہے۔
تفصیلات کے مطابق حیدرآباد میں سماجی ویب سائٹ پر ریاستی اداروں کے خلاف پوسٹ کرنے پر یو سی چیئرمین کو گرفتار کرلیا گیا۔
شاہ لطیف ٹاؤن یو سی ایک سو پندرہ کے چیئرمین شکیب قائمخانی کو ایف آئی اے نے گرفتار کیا، شکیب قائمخانی مسلسل سوشل میڈیا پر اداروں کے خلاف پوسٹ کر رہا تھا۔
یوسی چیئرمین کے خلاف سائبرکرائم کا مقدمہ درج ہے، گرفتار یوسی چیئرمین کا تعلق پی ٹی آئی سے ہے۔
یاد رہے دو روز قبل سوشل میڈیا پر ریاست اور ریاستی اداروں کے خلاف منفی پروپیگنڈے میں ملوث مزید 7 افراد کے خلاف مقدمات درج کئے گیے تھے، جس کے بعد تعداد 39 ہوگئی تھی۔
خیال رہے کہ حکومت پاکستان نے سوشل میڈیا پر غلط معلومات پھیلانے اور خوف پھیلانے سے نمٹنے کے لیے الیکٹرانک جرائم کی روک تھام کے پیکا ایکٹ میں ترمیم کرنے کا فیصلہ کیا تھا، جس میں قید اور جرمانے سمیت سزائیں دی جائیں گی۔
رپورٹس کے مطابق پاکستان میں قومی اداروں یا افراد کو نشانہ بنانے یا خوف پھیلانے والا کوئی بھی مواد ہٹا دیا جائے گا۔
ایک مسودہ تجویز میں ایک ڈیجیٹل رائٹس پروٹیکشن اتھارٹی کے قیام کی تجویز دی گئی ہے، جس کے پاس سوشل میڈیا مواد کو بلاک یا ہٹانے کا اختیار ہوگا۔
پیکا میں نئی ترمیم کے مطابق، ڈیجیٹل رائٹس پروٹیکشن اتھارٹی کو قانون نافذ کرنے والے اداروں یا افراد کو نشانہ بنانے والے مواد کو ہٹانے کے احکامات جاری کرنے کا اختیار ہوگا۔ یہ ریاست پاکستان اور اس کے اداروں کے خلاف نفرت پھیلانے والے مواد کو ہٹانے کا بھی ذمہ دار ہوگا۔
