اسلام آباد : تحریک انصاف نے الیکشن کمیشن کا فیصلہ متفقہ طور مسترد کرتے ہوئے الیکشن کمیشن کے خلاف احتجاج کا فیصلہ برقرار رکھا۔
تفصیلات کے مطابق چیئرمین پی ٹی آئی عمران خان کی زیرصدارت پی ٹی آئی ارکان کااجلاس ہوا ، جس میں فواد چوہدری، اسد عمر، عامر کیانی، شفقت محمود ،شہباز گل شریک ہوئے۔
اجلاس میں الیکشن کمیشن کے فیصلے پر عمران خان کو بریف کیا گیا ، جس کے بعد پی ٹی آئی قیادت نے الیکشن کمیشن کا فیصلہ متفقہ طور مسترد کر دیا۔
پی ٹی آئی قیادت نے کہا کہ پہلے دباؤ میں آئے نہ اب آئیں گے، الیکشن کمیشن کا فیصلہ بد نیتی پر مبنی ہے۔
عمران خان کی زیر صدارت اجلاس میں الیکشن کمیشن کے خلاف احتجاج کا فیصلہ برقرار رکھتے ہوئے فیصلے میں قانونی نقائص کو قوم کے سامنے رکھنے کا فیصلہ کیا گیا۔
اجلاس کے حوالے سے تحریک انصاف کے رہنما بابر اعوان نے بتایا کہ پارٹی قیادت اجلاس میں طے ہوا الیکشن کمیشن کافیصلہ مکمل غیر قانونی ہے ، پاکستان کے نامور قانون دانوں نے بھی اتفاق کیا کہ فیصلہ غیرقانونی ہے۔
بابر اعوان کا کہنا تھا کہ پرسوں الیکشن کمیشن کے باہر زبردست اور پر امن احتجاج ہوگا، پاکستان میں الیکشن کمیشن پر عدم اعتماد ہوچکا ہے ، دونوں صوبائی اسمبلیاں اسی فیصد پاکستاُنی عوام کی نمائندگی کرتی ہے۔
انھوں نے کہا کہ عدم اعتماد کے بعد کیا الیکشن کمیشن ٹمبک ٹو کا الیکشن کرائے گا۔
