سیالکوٹ : تحریک انصاف کے سربراہ عمران خان نے کہا ہے کہ عوام کرپشن کے خلاف گھروں سے باہر نکلنے کو تیار بیٹھے ہیں تحریک انصاف کو اس سلسلے میں کسی کی حمایت کی ضرورت نہیں۔
پاکستان تحریک انصاف کے سربراہ عمران خان سیالکوٹ میں ایک جلسہ سے خطاب کر رہے تھے،اپنے خطاب کے دوران انہوں نے وزیر اعظم پاکستان نوزشریف کی پالیسیوں کو شدید تنقید کا نشانہ بناتے ہوئے کہا کہ نوجوانوں میں بے روزگاری اور کسانوں میں غربت ہے اور ملک قرضوں کے بوجھ تلے دبا ہوا ہے۔
انہوں نے مزید کہا کہ ہمارے حکمراں بھکاریوں کی طرح امریکہ اور سعودیہ سے پیسے مانگتے ہیں جس کے باعث ملک کا بچہ بچہ مقروض ہو چکا ہے، بھیک مانگنے والے حکمرانوں نے یہ بھی نہیں سوچا کہ پیسے مانگنے والوں کی دنیا بھر میں کوئی عزت نہیں ہوتی،مقروض آنکھوں میں آنکھیں ڈال کر بات نہیں کر سکتے۔
عمران خان نے وزیر اعظم نواز شریف کو مشورہ دیتے ہوئے کہا کہ ملک کو کرپشن سے پاک کردیں تو کسی ملک سے قرضے لینے کی ضرورت نہیں رہے گی کرپشن اور قرضوں کی وجہ سے ملک عدم استحکام کا شکار ہے اور غیر مستحکم پاکستان، کشمیرکو آزادی نہیں دلا سکتا جب تک ہم اپنے پاؤں پر کھڑے نہیں ہو سکتے اس وقت تک کشمیر کی جنگ نہیں لڑ سکتے۔
عمران خان نے وزیر اعظم کی بیرون ملک سرجری پر شدید تنقید کرتے ہوئے کہا کہ نواز شریف ایک ایسا بھی اسپتال نہیں بنوا سکے جہاں وہ اپنا علاج ہی کروا سکیں،حال یہ ہے کہ سرکاری اسپتال میں ایک بستر پر چارچار مریض ہوتے ہیں،دوائیں ناپید ہیں اور سہولیات صفر ہیں۔
انہوں نے مزید کہا کہ نواز شریف بیرون ملک مقیم لوگوں سے پاکستان میں سرمایہ کاری کی درخواست کر رہے ہیں جب کہ خود اپنا سرمایہ ملک میں نہیں لاتے،یہاں تک کہ وزیر اعظم کے اپنے بچے بیرون ملک میں سرمایہ کاری کر رہے ہیں اس طرح کوئی دوسرا کیسے پاکستان میں اپنا سرمایہ لائے گا؟
اس موقع پر عمران خان نے نوازشریف کو مخاطب کرتے ہوئے کہا کہ آپ نے اسمبلی میں کھڑے ہو کر جھوٹ بولا اب پاکستان آرہے ہیں، پاکستانی عوام بھی آپ کی واپسی کے لیے منتظر ہیں، عوام سڑکوں پر آنے کے لیے تیار ہیں۔
