میرپور : آزاد کشمیر میں بلدیاتی انتخابات کے تیسرے مرحلے میں بھی پاکستان تحریک انصاف نے برتری حاصل کرلی، پی ٹی آئی ضلع کونسل، میونسپل کارپوریشنز، یوسیزاور میونسپل کمیٹیوں کی نشستوں پر سب سے آگے ہے۔
تفصیلات کے مطابق آزاد کشمیر میں بلدیاتی انتخابات کا تیسرا اور آخری مرحلہ میں میرپور ڈویژن میں بھی پاکستان تحریک انصاف نے برتری حاصل کرلی۔
پی ٹی آئی نے ضلع کونسل، میونسپل کارپوریشنز اور یوسیز کی نشستوں پر سب سے آگے ہیں، میرپور آزاد کشمیرکی ایک ہزار تراسی میں سے ایک سو تہتر نشستوں کا مکمل سرکاری نتیجہ آگیا۔
میرپور ڈویژن کی کل 1083 میں سے 359 نشستوں تحریک انصاف نے جیت لیں جبکہ پاکستان تحریک انصاف نے ضلع کونسل کی 53 نشستوں پر میدان مارلیا۔
میرپور،کوٹلی اوربھمبر کی ضلع کونسل کی 116نشستوں میں سے 111 کے نتائج موصول ہوئے، ضلع کونسل میں ن لیگ کو 23، پیپلز پارٹی کو 19 نشستیں ملیں جبکہ 16 آزاد امیدوار کامیاب ہوئے۔
میرپور اور کوٹلی کی میونسپل کارپوریشنز میں بھی پی ٹی آئی سب سے آگے رہی ، میرپور میونسپل کارپوریشن کی 46 میں سے 23 نشستیں پی ٹی آئی کے نام رہیں۔
میرپورمیونسپل کارپوریشن میں ن لیگ کو 11، پی پی کو ایک نشست ملی اور 10 آزاد امیدوار کامیاب ہوئے۔
کوٹلی میونسپل کارپوریشن کی 14میں سے 4نشستوں پر پی ٹی آئی کامیاب ہوئی جبکہ ن لیگ کو 3، پی پی کو ایک نشست ملی اور 6 آزاد امیدوار کامیاب ہوئے۔
یونین کونسل کی849 نشستوں میں سے 821 کے سرکاری نتائج آگئے ہیں ، جس میں پاکستان تحریک انصاف 266 یونین کونسل کی نشستوں پر کامیاب ہوئی۔
آزادامیدوار255، ن لیگ 174 اور پی پی 111 یونین کونسل نشستوں پرکامیاب رہی، اس کے علاوہ اے جے کے مسلم کانفرنس6 ، تحریک لبیک 8، جے آئی 1 یونین کونسل نشست پر کامیاب ہوئی۔
