پشاور: پاکستان تحریک انصاف نے جاں بحق ہونے سورن سنگھ کی خالی نشست پر روی کمار کو نامزد کر دیا ۔
پاکستان تحریک انصاف کی جانب سے جاری کردہ پریس ریلیز کے مطابق سورن سنگھ کی ہلاکت کے بعد صوبائی الیکشن کمیشن کو ارسال کی جانے والی فہرست میں پہلے پی ٹی آئی کونسلر بلدیو کمارکو امیدورا نامزد کیاگیا تھا تاہم پولیس نے چند روز بعد بلدیو کمار کو سورن سنگھ کے قتل کے الزام میں گرفتار کر لیاتھا جس کے بعد اب پی ٹی آئی نے الیکشن کمیشن کو درخواست دی ہے جس میں کہا گیا ہے کہ بلدیو کمار کا نام مخصوص ترجیحی فہرست سے نکالا جائے ۔
اس سے قبل پی ٹی آئی کی جانب سے الیکشن کمیشن کو دی جانے والی ترجیحی فہرست میں بلدیو کمار کا نام دوسرے جبکہ روی کمار کا تیسرے نمبر پر رکھا گیا تھا ۔
واضح رہے کہ بلدیو کمار اس وقت سورن سنگھ قتل کیس کے مرکزی ملزم کی حیثیت سے زیر حراست ہیں، جن کے خلاف تعزیرات پاکستان کی دفعہ302 اور انسداد دہشتگردی ایکٹ کی دفعہ 7 کے تحت مقدمہ نمبر 216 درج ہے ۔
