پی ٹی آئی کےنامزدوزیراعلیٰ پنجاب اڑھائی کروڑ سے زائد مالیت کے اثاثوں کے مالک
The news is by your side.

Advertisement

پی ٹی آئی کےنامزدوزیراعلیٰ پنجاب اڑھائی کروڑ سے زائد مالیت کے اثاثوں کے مالک

لاہور :پاکستان تحریک انصاف کے نامزد وزیراعلیٰ پنجاب عثمان بزدار اڑھائی کروڑ سے زائد مالیت کے اثاثوں کے مالک نکلے، عثمان بزدار  کا کہنا ہے کہ ذمہ داری سونپنے  پر عمران خان کا مشکور ہوں۔

تفصیلات کے مطابق پی ٹی آئی کے نامزد وزیراعلیٰ پنجاب عثمان بزدار نےاثاثوں کی تفصیلات جمع کرادی ، جس کے مطابق عثمان بزدار اڑھائی کروڑ سے زائد مالیت کے اثاثوں کے مالک ہیں۔

اثاثوں کی تفصیلات کے مطابق عثمان بزدار کی ملکیت میں 284کنال زمین،3ٹریکٹر،2 گاڑیاں اور 20 تولہ سونا جبکہ 50 ہزار کا فرنیچر عثمان بزدار کی ملکیت میں ہیں۔

الیکشن کمیشن میں جمع تفصیلات کے مطابق عثمان بزدار کے پاس ڈی جی خان موضع چوٹی میں 163کنال کی زرعی اراضی، موضع روانی میں 95 کنال، تونسہ شریف میں 14 کنال اور دیگر مقامات پر بھی زمینیں ہیں۔

عثمان بزدار کے 4بینکوں میں اکاؤنٹ ہیں جبکہ انھوں نے تین کمپنیوں سےانشورنس پالیسی لے رکھی ہے، ایک انشورنس پالیسی 5 اور دوسری 10لاکھ روپے کی ہے اور ان کے پاس11لاکھ کے ماہانہ ٹرم سرٹیفکیٹ ہیں۔

مالی سال 2017 میں نامزد وزیراعلیٰ پنجاب عثمان بزدار نے 63 ہزار 890روپے ٹیکس ادا کیا۔

اس سے قبل پنجاب کی وزارت اعلٰی کیلئے پی ٹی آئی کے امیدوار سردار عثمان بزدار  نے کاغذات نامزدگی جمع کرا ئے، سردار عثمان بزدار کا کہنا ہے کہ وہ ذمہ داری سونپنے پر عمران خان کے مشکور ہیں، جنوبی پنجاب کو الگ صوبہ بنانے کیلئے ابھی مزید انتظار کرنا ہو گا

مزید پڑھیں : عمران خان نے سردارعثمان بزدار کو وزیراعلیٰ پنجاب نامزد کرنے کا اعلان کردیا

یاد رہے کہ عمران خان نے سردارعثمان بزدار کو وزیراعلیٰ پنجاب نامزد کیا تھا ، سردارعثمان بزدارکا تعلق پسماندہ علاقے تونسہ شریف سے ہے۔

عثمان بزدارپی ٹی آئی کے ٹکٹ پر پی پی 286 تونسہ شریف سے منتخب ہوئے تھے۔

نامزد وزیراعلیٰ پنجاب اپنے قبیلے کے سردارہیں جبکہ انھوں نے پولیٹیکل سائنس میں ماسٹرز کررکھا ہے، سردارعثمان بزدارجنوبی پنجاب محاذکےسرگرم رکن ہیں۔

Comments

comments

یہ بھی پڑھیں