اسلام آباد: وزارت انسانی حقوق نے کو وِڈ 19 کی وبا کے دوران ذہنی صحت کے لیے عوامی آگاہی کی گائیڈ لائنز جاری کر دی ہیں۔
اے آر وائی نیوز کے مطابق کرونا وائرس کی وبا کے پھیلاؤ اور ہلاکت خیزی کو دیکھتے ہوئے عوام کے اندر ذہنی صحت کے مسائل پیدا ہونے کا خدشہ ہے، جس کے پیش نظر وزارت انسانی حقوق نے گائیڈ لائنز جاری کرتے ہوئے خبردار کیا ہے کہ کرونا سے عوام میں تناؤ اور ذہنی اضطراب پیدا ہو سکتے ہیں۔
گائیڈ لائنز میں کہا گیا ہے کہ اپنے آس پاس لوگوں کی ذہنی اور نفسیاتی فلاح و بہبود کا خیال رکھیں، جھوٹی خبریں اور افراتفری نہ پھیلائیں، اپنے ذرایع کی تصدیق کریں۔
گائیڈ لائنز کے مطابق اپنے دوستوں اور رشتہ داروں کا خیال رکھیں، خاص طور پر جو ڈپریشن، اضطراب یا کسی اور بیماری کا شکار ہیں، وبا سے متاثرہ افراد سے متعلق غلط باتیں نہ کریں، انھیں بدنام نہ کریں، کسی بھی نسل، قومیت یا مذہب کو وبا سے منسلک نہ کریں۔
سندھ حکومت کا 10 ہزار بیڈز پر مشتمل آئسولیشن سینٹرز قائم کرنے کا فیصلہ
وزارت انسانی حقوق نے کہا ہے کہ آپ کسی ایسے شخص کو جانتے ہیں جو کسی قسم کے تشدد کا شکار ہے تو وزارت انسانی حقوق کی ہیلپ لائن 1099 پر فوری رابطہ کریں۔
واضح رہے کہ نیشنل کمانڈ اینڈ آپریشن سینٹر نے کرونا وائرس سے متعلق تازہ اعداد و شمار جاری کرتے ہوئے بتایا ہے کہ پاکستان میں کرونا کے 5 ہزار 125 مریض زیر علاج ہیں، 24 گھنٹوں کے دوران کرونا کے 497 کیس رپورٹ ہوئے، جس کے بعد کرونا کے تصدیق شدہ کیسز کی تعداد 7 ہزار 25 ہو گئی ہے۔ جب کہ 24 گھنٹوں کے دوران 11 نئی اموات رپورٹ ہوئیں جس کے بعد اموات کی تعداد 135 تک جا پہنچی ہے۔
