پنجاب کمپنیز اسکینڈل: اربوں روپے کی کرپشن کے انکشافات نے تہلکہ مچا دیا
The news is by your side.

Advertisement

پنجاب کمپنیز اسکینڈل: اربوں روپے کی کرپشن کے انکشافات نے تہلکہ مچا دیا

لاہور : پنجاب کمپنیز اسکینڈل کی تحقیقات میں ہونے والے نئے انکشافات نے تہلکہ مچا دیا، چھپن میں سے گیارہ کمپنیوں کی آڈٹ رپورٹ مکمل ہوگئی۔ گیارہ کمپنیوں میں ایک سو چھیاسٹھ ارب کی بے ضابطگی سامنے آگئی۔

تفصیلات کے مطابق پنجاب کمپنی اسکینڈل میں چھپن میں سے گیارہ کاکمپنیوں کی آڈٹ رپورٹ مکمل کرلی گئی،ان کمپنیوں میں فراڈ اور گڑبڑ کی نشاندہی کی گئی ہے۔

رپورٹ میں ایک سو چھیاسٹھ ارب کی بےضابطگیوں، فراڈ، مبینہ کرپشن کی نشاندہی کی گئی ہے، تحقیقاتی رپورٹ کے مطابق فیصل آباد ویسٹ مینجمنٹ کمپنی میں چھیاسی کروڑسڑسٹھ لاکھ ستاسی ہزارکی مبینہ کرپشن کی گئی۔

فیصل آباد کیٹل منیجمنٹ مارکیٹ کمیٹی میں اکیاون کروڑ تیرہ لاکھ کے گھپلوں کا انکشاف ہوا، لاہور ویسٹ مینجمنٹ کمپنی میں ایک سو چوالیس ارب اڑتیس کروڑ پینتیس لاکھ کرپشن کا ٹیکا لگایا گیا۔

لاہور پارکنگ کمپنی میں چودہ ارب سینتیس کروڑ تیرہ لاکھ اکیاسی ہزارکا رگڑا لگا، پنجاب میونسپل ڈویلپمنٹ فنڈ دوہزار سولہ میں ایک ارب اکیس کروڑ بیس لاکھ پر ہاتھ صاف کئے گئے۔

گوجرانوالہ ویسٹ مینجمنٹ کمپنی میں ایک ارب تیراسی کروڑ سولہ لاکھ اور گوجرانوالہ کیٹل مینجمنٹ مارکیٹ کمیٹی میں اٹھارہ کروڑ انتالیس لاکھ کی مبینہ کرپشن رپورٹ ہوئی۔

بہاولپور کیٹل مینجمنٹ مارکیٹ کمپنی میں چھبیس کروڑ چھیانوے لاکھ اڑسٹھ ہزار کا چونا لگایا گیا۔ سیالکوٹ ویسٹ مینجمنٹ کمپنی میں ایک ارب پچانوے کروڑ پینتیس لاکھ سات ہزار کی کرپشن کی گئی۔ ڈی جی خان کیٹل مینجمنٹ مارکیٹ کمیٹی میں تیرہ کروڑ باہتر لاکھ کی کرپشن رپورٹ ہوئی۔


خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

Comments

comments

یہ بھی پڑھیں