لاہور: صوبہ پنجاب میں مذہبی منافرت پر مبنی لٹریچر کی اشاعت و تقسیم کے خلاف کریک ڈاؤن کا فیصلہ کیا گیا ہے۔
تفصیلات کے مطابق آج وزیر اعلیٰ پنجاب سے وفاقی وزیر داخلہ شیخ رشید نے ملاقات کی، جس میں وفاقی وزیر مذہبی امور پیر نورالحق قادری بھی موجود تھے، ملاقات میں سیاسی امور اور امن و امان کی صورت حال پر تبادلہ خیال کیا گیا، جب کہ مذہبی ہم آہنگی کے فروغ کے لیے اقدامات پر بھی بات چیت کی گئی۔
ملاقات میں امن و امان اور سیکیورٹی صورت حال کی مزید بہتری کے لیے ہر ممکن اقدام پر اتفاق کیا گیا، فیصلہ کیا گیا کہ اشتعال انگیز تقاریر کرنے والوں کے خلاف بلا امتیاز کارروائی ہوگی، ملاقات میں امن عامہ کی بہتری کے لیے پنجاب اور وفاق میں مربوط کوآرڈینیشن پر بھی اتفاق کیا گیا۔
اس موقع پر وزیر داخلہ شیخ رشید نے کہا وفاقی وزارت داخلہ پنجاب حکومت کو سپورٹ کرے گی، پیر نور الحق قادری کا کہنا تھا معاشرے میں تحمل اور برداشت کو فروغ دینے کی ضرورت ہے۔
وزیر اعلیٰ پنجاب عثمان بزدار نے کہا عوام کے جان و مال کے تحفظ کے لیے تمام ضروری اقدامات کریں گے، قانون کی حکمرانی یقینی بنانے کے لیے آخری حد تک جائیں گے، کسی کو قانون ہاتھ میں لینے کی اجازت نہیں دی جائےگی، اور ایسا کرنے والے عناصر کے خلاف سخت کارروائی ہوگی۔
