The news is by your side.

Advertisement

شہباز شریف کی حکومت 2 ماہ سے پہلے انجام کو پہنچ جائے گی، طاہر القادری

لاہور: پاکستان عوامی تحریک کے قائد اور منہاج القرآن کے سربراہ ڈاکٹر علامہ طاہر القادری نے کہا ہے کہ شہبازشریف کی حکومت 2 ماہ سے پہلے اپنے انجام کو پہنچ جائے گی۔

لاہور میں میڈیا سے گفتگو کرتے ہوئے طاہر القادری کا کہنا تھا کہ پنجاب حکومت کے خاتمے کےلیے 2 ماہ کا وقت احتیاطاً دے رہا ہوں، حالات سے معلوم ہوتا ہے شہبازشریف 2 ماہ سے قبل اپنے انجام کو پہنچ جائیں گے۔

اُن کا کہنا تھا کہ ’حکومت کے گھر جاتے ہی سانحہ ماڈل ٹاؤن کےذمہ داروں سےنجات مل جائےگی اور پھر اُن کے خلاف قانونی کارروائی عمل میں لائی جائے گی‘۔

طاہر القادری کا کہنا تھا کہ تحریک انصاف اور پیپلزپارٹی ماڈل ٹاؤن قصاص کے لیے ہمارے ساتھ ہیں، دونوں جماعتوں کے اپنا مؤقف ہے، میں ذاتی طور پر دونوں کے گلے شکوے دور کروانے کی کوشش میں مصروف ہوں‘۔

مزید پڑھیں: مال روڈ احتجاج: ایم کیو ایم پاکستان کا وفد جلسے سے اٹھ کر چلا گیا

پاکستان عوامی تحریک کے سربراہ کا کہنا تھا کہ ’مال روڈ جلسہ ہماری حکمتِ عملی کے عین مطابق تھا، مختلف نظریات کے لوگوں کو یکجا کر کے چلنا آسان کام نہیں مگر ہم اس میں ضرور کامیاب ہوں گے، ایم کیو ایم پاکستان اگلے مرحلے میں ساتھ ہو گی‘۔

واضح رہے کہ 17 جنوری کو لاہور کے علاقے مال روڈ پر پاکستان عوامی تحریک کی جانب سے جلسے کا انعقاد کیا گیا تھا جس میں دیگر جماعتوں کی جانب سے بھرپور شرکت کی گئی تھی تاہم ایم کیو ایم پاکستان کا وفد درمیان میں اٹھ کر چلا گیا تھا۔

یاد رہے کہ ایم کیو ایم پاکستان کے وفد نے ڈاکٹر فاروق ستار کی سربراہی میں چند روز قبل پاکستان عوامی تحریک کی آل پاکستان کانفرنس میں‌ شرکت کی تھی، مگر اے پی سی اعلامیے کو حتمی شکل دیتے ہوئے ایم کیو ایم کی جانب سے تحفظات کا اظہار کیا گیا تھا۔ ڈاکٹر فاروق ستارکا موقف تھا کہ شہبازشریف اور رانا ثنااللہ کا نام اعلامیہ میں شامل نہ کیا جائے، ان ہی اختلافات کے باعث ایم کیو ایم کا وفد اعلامیہ پر دستخط کیے بغیر اے پی سی سے واپس چلاگیا تھا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں