لاہور: وزیر قانون پنجاب راجہ بشارت کا کہنا ہے کہ زیرالتوا کیسز جلد نمٹانے میں رکاوٹیں دورکی جائیں، پولیس افسران بورڈ کی جائیدادوں پر قبضے ختم کرانے کے لیے تعاون کریں۔
تفصیلات کے مطابق لاہور میں وزیرقانون پنجاب کی زیرصدارت کوآپریٹوزلیکوڈیشن بورڈ کی اسپیشل کمیٹی کا اجلاس ہوا جس میں سفارشات اور مجوزہ قانونی ترامیم کے مسودے کا جائزہ لیا گیا۔
اجلاس میں بریفنگ کے دوران بتایا گیا کہ 6 اضلاع میں بورڈ کی 15جائیدادوں کی نیلامی شروع کر دی گئی، اضلاع میں گوجرانوالہ، سرگودھا، وہاڑی، اوکاڑہ، ٹوبہ ٹیک سنگھ اور ملتان شامل ہیں۔
وزیر قانون پنجاب کو بتایا گیا کہ کامونکی، سمندری، نوشہرہ ورکاں میں 251 کنال زمین واگزار کرالی گئی، 153 نادہندگان کے خلاف قانونی کارروائی شروع ہو چکی ہے۔ اجلاس میں بتایا گیا کہ نیب کو بھی کیس بھجوائے جا رہے ہیں، ماتحت عدالتوں میں 51 کیسز زیرالتوا ہیں، پولیس تعاون فراہم نہیں کرتی۔
راجہ بشارت نے کہا کہ زیرالتوا کیسز جلد نمٹانے میں رکاوٹیں دورکی جائیں، پولیس افسران بورڈ کی جائیدادوں پر قبضے ختم کرانے کے لیے تعاون کریں۔ انہوں نے مزید کہا کہ جائیدادوں کی نیلامی کے عمل کو ہر ممکن شفاف رکھا جائے۔
یاد رہے کہ گزشتہ ہفتے وزیر اعلیٰ پنجاب عثمان بزدار کا کہنا تھا کہ عوام کے جان و مال کا تحفظ پولیس کی بنیادی ذمہ داری اور اولین فرض ہے، تھانوں میں عام آدمی کی داد رسی کے لیے پولیس کو فعال انداز میں کام کرنا ہے۔
