لاہور(16 اکتوبر 2025): وزیراعلیٰ پنجاب مریم نواز نے ریاستی رٹ اور قانون کی بالادستی قائم کرنے کیلئے غیر معمولی اور تاریخی فیصلے کیے ہیں۔
وزیراعلیٰ مریم نواز شریف کی زیرصدارت امن وامان پر غیر معمولی اجلاس منعقد کیا گیا، اجلاس میں فیصلہ کیا گیا کہ پنجاب حکومت وفاقی حکومت کو انتہا پسند جماعت پر پابندی عائد کرنے کی سفارش کرے گی۔
اجلاس میں فیصلہ کیا گیا کہ پنجاب میں نفرت انگیزی، اشتعال انگیزی، قانون شکنی میں ملوث افراد کو فوری گرفتار کیا جائے گا جبکہ پولیس افسران کی شہادت اور سرکاری املاک کی تباہی میں ملوث افراد کے خلاف اے ٹی سی میں مقدمات چلیں گے۔
اجلاس میں فیصلہ کیا گیا کہ انتہا پسند جماعت کی قیادت کو انسداد دہشت گردی ایکٹ کے فورتھ شیڈول میں شامل کیا جائے گا اور انتہا پسند جماعت کی تمام جائیدادیں اور اثاثے محکمہ اوقاف کے حوالے کیے جائیں گے، انتہا پسند جماعت کے پوسٹرز، بینرز اور اشتہارات پر مکمل پابندی ہوگی۔
اجلاس میں نفرت پھیلانے والی انتہا پسند جماعت کے سوشل میڈیا اکاؤنٹس بند اور تمام بینک اکاؤنٹس منجمد کرنے کا بھی فیصلہ کیا گیا ہے، اجلاس میں لاؤڈ اسپیکر ایکٹ کی خلاف ورزی پر سخت ترین کارروائی اور افغان شہریوں کو ٹیکس نیٹ میں لانے کا بھی فیصلہ کیا گیا ہے، پنجاب حکومت غیر قانونی افغان باشندوں کا ریئل ٹائم ڈیٹا تیار کرے گی۔
اجلاس میں فیصلہ کیا گیا ہے کہ غیر قانونی تارکین وطن کے لئے وہسِل بلوئر سسٹم متعارف کرایا جائے گا، پنجاب حکومت نے غیر قانونی رہائشیوں، انکے کاروبار کے خلاف کومبنگ آپریشن شروع کرنے کا فیصلہ کیا گیا ہے جبکہ اطلاع دینے والے کا نام مکمل رازداری میں رکھا جائے گا۔
اجلاس میں فیصلہ کیا گیا ہے کہ غیر قانونی مقیم غیر ملکی باشندوں کو وفاقی حکومت کی پالیسی کے مطابق فوری ڈی پورٹ کیا جائے گا۔
اجلاس میں پنجاب حکومت نے غیر قانونی اسلحہ کی فوری برآمدگی کا حکم جاری کیا ہے اور ہوم ڈیپارٹمنٹ پنجاب کی جانب سے غیر قانونی اسلحے کو ایک ماہ میں جمع کروانےکا الٹی میٹم جاری کیا گیا ہے۔
اعلامیے میں کہا گیا ہے کہ ایک ماہ کے اندر شہری اپنا قانونی اسلحہ خدمت مرکز سے رجسٹر کرائیں، اسلحہ فروشوں اور تمام ڈیلرز کے اسٹاک کا معائنہ کرنے کے حکم دیا گیا ہے، پنجاب میں نئے اسلحہ لائسنس جاری کرنے پر مکمل پابندی لگائی گئی ہے۔
پنجاب حکومت نے وفاقی حکومت سے اسلحہ فیکٹریز، مینوفیکچررز کو ریگولرائز کرنےکی سفارش کی ہے، پنجاب حکومت نے غیر قانونی اسلحہ رکھنے کی سزا میں اضافے کی منظوری بھی دے دی جس کے بعد غیر قانونی اسلحہ رکھنے کی سزا 14 سال قید اور 20 لاکھ تک جرمانہ مقرر، ناقابل ضمانت جرم بنا دیا گیا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں