The news is by your side.

Advertisement

مذاکرات کامیاب، کل سے پنجاب میں اسکول کھول دیئے جائیں گے

لاہور : پنجاب میں اسکول چھ روز بند رہنے کے بعد پیر سے کھل جائیں گے۔ پنجاب حکومت نے نجی اسکولوں کے مطالبات تسلیم کر لئے.

تفصیلات کے مطابق آل پاکستان پرائیویٹ اسکولز فیڈریشن کے چیئرمین کاشف مرزا نے کہا ہے کہ کل سے اسکول کھول دیئے جائیں گے جبکہ بڑے نجی اسکولوں نے یقین دہانی کے باوجود تعلیمی سرگرمیاں شروع کرنے سے فی الحال انکار کر دیا ہے۔

محکمہ تعلیم پنجاب نے پرائیویٹ اسکولز فیڈریشن سے مذاکرات کے بعد نجی اسکول مالکان کے مطالبات تسلیم کرنے کا نوٹیفیکیشن جاری کر دیا ہے۔

حکومت نے یقین دہانی کرائی ہے کہ اسکولوں کیخلاف درج مقدمات واپس لے لئے جائیں گے اور مزید مقدمات درج نہیں کئے جائیں گے۔ نوٹیفیکیشن کے مطابق ناقص سکیورٹی پر اسکولوں کو دو بار نوٹس جاری کئے جائیں گے، پھر بھی انتظامات بہتر نہ ہونے پر کارروائی ہو گی۔

تمام بڑے نجی اسکولوں نے حکومت کے اس نوٹیفیکیشن کے باوجود تعلیمی سرگرمیاں شروع کرنے سے انکار کر دیا ہے اور بچوں کے والدین کو ایس ایم ایس کئے ہیں کہ اگلی اطلاع تک سکول بند رہیں گے۔

آل پاکستان پرائیویٹ اسکولز فیڈریشن کے چیئرمین کاشف مرزا نے پریس کانفرنس میں اعلان کیا ہے کہ حکومت نے مطالبات تسلیم کر لئے ہیں اور کل سے اسکول کھول دیئے جائیں گے۔

ان کا کہنا تھا کہ والدین کو بروقت اطلاع نہ ہونے کے باعث شاید کچھ نجی تعلیمی ادارے صبح نہ کھل سکیں، لیکن اگلے دو روز میں پنجاب بھر میں تعلیمی ادارے معمول کے مطابق کھلیں گے۔

سکیورٹی معاملات کے حوالے سے انہوں نے کہا کہ اسکولز ایس او پی پر عمل درآمد کرینگے لیکن سکیورٹی فراہم کرنا حکومت کی ذمہ داری ہے.

حکومت پہلے سرکاری اداروں کی دیواریں اونچی کرے تو نجی تعلیمی ادارے بھی کر لیں گے۔ انہوں نے کہا کہ نجی تعلیمی ادارے فیسیں بڑھانے کے بہانے تلاش نہیں کر رہے، والدین کو یقین دلاتے ہیں کہ بچوں کی فیسیں نہیں بڑھائی جائیں گی۔

Comments

comments

یہ بھی پڑھیں